మెదక్, నర్సాపూర్ నియోజకవర్గాల్లోని 11 మండలాల్లో ఉన్న 395 ప్రభుత్వ పాఠశాలలు, 10 జూనియర్ కళాశాలల విద్యార్థులకు ఈ వంటశాల ద్వారా భోజనం అందుతుంది. కార్మిక మంత్రి గడ్డం వివేక్ వెంకటస్వామి ఈ కేంద్రీకృత కమ్యూనిటీ కిచెన్ను ప్రారంభించారు.
ఈ కార్యక్రమంలో HKMCF ఇండియా అధ్యక్షుడు శ్రీ సత్య గౌరా చంద్ర దాస స్వామీజీ, మెదక్ ఎమ్మెల్యే మైనంపల్లి రోహిత్ పాల్గొన్నారు. శ్రీ సత్య గౌరా చంద్ర దాస స్వామీజీ అక్షయ పాత్ర ఫౌండేషన్ తెలంగాణ, ఆంధ్రప్రదేశ్ ప్రాంతీయ అధ్యక్షుడిగా కూడా వ్యవహరిస్తున్నారు.
పిల్లల ఆరోగ్యం, చదువులో వారి ప్రతిభను పెంచేందుకు తెలంగాణ ప్రభుత్వం చేపట్టిన 'తెలంగాణ స్కూల్ బ్రేక్ఫాస్ట్ ప్రోగ్రామ్' (ప్రభుత్వ పాఠశాల విద్యార్థులకు ఉదయం పూట పౌష్టికాహారం అందించే పథకం) అమలులో HKMCF ఇండియా ప్రధాన భాగస్వామిగా ఉంది. ఈ పథకం ద్వారా విద్యార్థులకు పోషక విలువలున్న అల్పాహారాన్ని అందిస్తారు.
ఈ కొత్త వంటశాల ద్వారా మొత్తం 29,183 మంది విద్యార్థులకు ప్రతిరోజూ అల్పాహారం అందనుంది. ప్రభుత్వ పాఠశాలలు, కళాశాలల్లో చదువుతున్న విద్యార్థుల పోషణపై ప్రత్యేక దృష్టి పెట్టేందుకు ఈ సౌకర్యాన్ని ఏర్పాటు చేశారు.
