నవంబర్ 20న ఎక్స్ (ట్విట్టర్) వేదికగా ఈ వీడియో బయటకు వచ్చింది. ఇందులో కరణ్ గుర్జర్ పేరుతో ఉన్న భారీ సౌండ్ సిస్టమ్ ఒక వీధి గుండా వెళ్తుండగా, ఆ శబ్ద తీవ్రతకు స్థానికులు చెవులు మూసుకున్నారు. ఈ ఘటన ఉత్తరప్రదేశ్‌లోని హాపూర్ జిల్లా కాఠిఖేడా గ్రామంలో జరిగినట్లు ఇన్‌స్టాగ్రామ్ ఖాతా ద్వారా తెలుస్తోంది.

ఈ డీజే శబ్దాల వల్ల కలిగే కంపనాలకు దుకాణాల వద్ద ఉన్న పెద్ద బిర్యానీ గిన్నెలు, పాత్రలు తమంతట తామే కదులుతూ చప్పుడు చేశాయి. అంతేకాకుండా, వాటర్ కూలింగ్ మెషిన్ డ్రైనేజీలోని నీరు బయటకు చిమ్మడం, టిన్ షెడ్ల నుంచి దుమ్ము రాలడం వంటి దృశ్యాలు వీడియోలో స్పష్టంగా కనిపిస్తున్నాయి.

ఈ వీడియోను ఎప్పుడు చిత్రీకరించారనే దానిపై స్పష్టత లేదు. అయితే, ఇది సోషల్ మీడియాలో లక్షకు పైగా వ్యూస్ సాధించడంతో పాటు శబ్ద కాలుష్యంపై పెద్ద ఎత్తున చర్చకు దారితీసింది.

ఇంతటి శబ్ద తీవ్రత వృద్ధులు, చిన్నారులు, గుండె సంబంధిత సమస్యలు ఉన్నవారికి చాలా ప్రమాదకరమని నెటిజన్లు ఆందోళన వ్యక్తం చేశారు. కొందరు యూజర్లు ఇటువంటి డీజేలపై కఠిన చర్యలు తీసుకోవాలని, వీటిని నిషేధించాలని డిమాండ్ చేశారు.

మరోవైపు, వేడుకల నిర్వహణకు తీసుకునే అనుమతులు, నిబంధనల అమలుపై కూడా సోషల్ మీడియాలో వాదనలు మొదలయ్యాయి. పండుగలు, ఊరేగింపుల సమయంలో శబ్ద పరిమితులను పాటించాల్సిన అవసరాన్ని ఈ ఘటన మరోసారి గుర్తుచేస్తోంది.