అమెరికాలో టెక్నాలజీ రంగ నిపుణుడు, పరిశోధకుడు వివేక్ వాధ్వా H-1B వీసా ప్రోగ్రామ్పై కీలక వ్యాఖ్యలు చేశారు. విదేశీ నిపుణులకు అమెరికాలో పని చేసే అవకాశం కల్పించే H-1B వీసా విధానాన్ని ముగించాలని ఆయన పిలుపునిచ్చారు.
గతంలో అమెరికా ప్రపంచ నాయకుడిగా ఎదగడంలో ఈ వీసాలు కీలక పాత్ర పోషించాయని వాధ్వా అంగీకరించారు. అయితే, ప్రస్తుతం ఈ ప్రోగ్రామ్ దోపిడీకి, తక్కువ వేతనాలకు శ్రామికులను వాడుకోవడానికి (లేబర్ అర్బిట్రేజ్) అడ్డాగా మారిందని ఆయన ఆరోపించారు.
గ్రీన్ కార్డ్ లేదా శాశ్వత నివాస హోదా కోసం దశాబ్దాల తరబడి వేచి చూడాల్సిన పరిస్థితి ఉండటాన్ని ఆయన ప్రమాదకరంగా అభివర్ణించారు. ఈ సమస్యలన్నింటినీ అధిగమించడానికి ప్రస్తుత వీసా విధానాన్ని పూర్తిగా పునర్వ్యవస్థీకరించాలని ఆయన కోరారు.
దీనికి బదులుగా కొత్త నైపుణ్యం ఆధారిత ఇమ్మిగ్రేషన్ వ్యవస్థను ప్రవేశపెట్టాలని వాధ్వా సూచించారు. శాస్త్రవేత్తలు, ఇంజనీర్లు, పరిశోధకులు మరియు ఇతర నైపుణ్యం కలిగిన వ్యక్తులను అమెరికాకు ఆకర్షించేలా ఈ కొత్త విధానం ఉండాలని ఆయన పేర్కొన్నారు.
కంపెనీలు తక్కువ ధరకే శ్రామికులను పొందేందుకు ఇమ్మిగ్రేషన్ ప్రోగ్రామ్లను వాడుకోకుండా కఠిన చర్యలు తీసుకోవాలని ఆయన కోరారు. ఈ మార్పుల కోసం అమెరికా కాంగ్రెస్ (అమెరికా చట్టసభ) తక్షణమే స్పందించాలని వాధ్వా విజ్ఞప్తి చేశారు.
