న్యూ ఢిల్లీలోని భరత మండపం వేదికగా జరుగుతున్న బ్రిక్స్ 2026 సదస్సులో ప్రధాని నరేంద్ర మోడీ తమిళ సంస్కృతికి పెద్దపీట వేశారు. 11 దేశాల ప్రతినిధులు హాజరైన ఈ సమావేశంలో, భారతీయ ప్రాంతీయ వైవిధ్యాన్ని చాటిచెప్పేందుకు ఆయన తమిళనాడు ప్రాచీన వారసత్వాన్ని ఎంచుకున్నారు.
సదస్సుకు వచ్చిన రష్యా అధ్యక్షుడు వ్లాదిమిర్ పుతిన్కు ప్రధాని మోడీ ‘తిరుక్కురల్’ పుస్తకాన్ని కానుకగా ఇచ్చారు. తిరువళ్లూర్ అనే కవి రచించిన ఈ గ్రంథం, ధర్మం, అర్థం, కామం అనే మూడు అంశాలతో 133 అధ్యాయాలను కలిగి ఉంటుంది. ఇరు దేశాల ప్రజల మధ్య ఈ పుస్తకం ఒక వారధిగా నిలుస్తుందని ప్రధాని ఆకాంక్షించారు.
ఈ గ్రంథంపై రష్యన్లకు 17వ శతాబ్దం నుంచే ఆసక్తి ఉంది. ప్రముఖ రష్యన్ రచయిత లియో టాల్స్టాయ్ కూడా ఈ గ్రంథాన్ని చదివి, తన రచనలపై దాని ప్రభావం ఉందని గతంలో పేర్కొన్నారు. అందుకే పుతిన్కు రష్యన్ భాషలోకి అనువదించిన తిరుక్కురల్ ప్రతిని మోడీ అందించారు.
సదస్సులో పాల్గొన్న దేశాధినేతలకు ప్రధాని మోడీ రామనాథస్వామి ఆలయ విశిష్టతను కూడా వివరించారు. తమిళనాడులోని పంబన్ ద్వీపంలో ఉన్న ఈ ఆలయం, శివుడికి అంకితమిచ్చిన 12 జ్యోతిర్లింగాలలో ఒకటి. 12,000 గ్రానైట్ రాతి స్తంభాలతో ద్రవిడ శిల్పకళా నైపుణ్యంతో ఈ ఆలయం నిర్మితమైంది.
వాల్మీకి రామాయణం ప్రకారం, రావణ సంహారం తర్వాత రాముడు ఈ ఆలయంలోని లింగాన్ని పూజించారని ప్రతీతి. ఇక్కడ గర్భగుడిలో సీతాదేవి ఇసుకతో చేసిన రామలింగం, హనుమంతుడు కైలాసం నుంచి తెచ్చిన విశ్వలింగం ఉంటాయి. భక్తులు సముద్ర స్నానం తర్వాత ఆలయంలోని 22 పవిత్ర గుండాల్లో స్నానమాడి దైవ దర్శనం చేసుకుంటారు.
ప్రధాని మోడీ 2024లో ఈ ఆలయాన్ని దర్శించుకున్న తర్వాత, అయోధ్య రామాలయంలో బాలరాముడి ప్రాణప్రతిష్టలో పాల్గొన్నారు. ఆధ్యాత్మికంగా, చారిత్రకంగా ప్రాముఖ్యత కలిగిన ఈ ఆలయ దృశ్యాలను, సదస్సులో పాల్గొన్న ఇతర దేశాధినేతలకు డిజిటల్ తెరల ద్వారా ప్రధాని చూపించారు.
