చాలామంది గురకను కేవలం ఒక సాధారణ శబ్దంలా చూస్తారు, కానీ ఇది పక్కన పడుకునే వ్యక్తి ఆరోగ్యాన్ని నిశబ్దంగా దెబ్బతీసే సమస్య. గురక పెట్టే వ్యక్తి కంటే, ఆ శబ్దం వల్ల నిద్రలేమితో బాధపడే వారిపైనే దీని ప్రభావం ఎక్కువగా ఉంటుందని తాజా అధ్యయనాలు చెబుతున్నాయి.
నిద్రలో శ్వాసనాళంలోని మెత్తని కణజాలాలు కంపించడం వల్ల ఈ పెద్ద శబ్దం వస్తుంది. ఈ శబ్దం పక్కనున్న వ్యక్తి గాఢ నిద్రకు పదేపదే భంగం కలిగిస్తుంది, దీనివల్ల శరీరానికి అందాల్సిన విశ్రాంతి దక్కక జీవక్రియల లయ దెబ్బతింటుంది.
నిరంతర నిద్రలేమి వల్ల మనిషి ఆరోగ్యంపై తీవ్ర ప్రభావాలు ఉంటాయి. రాత్రి సరిగ్గా నిద్రపోని వారు మరుసటి రోజు మద్యం సేవించిన తర్వాత వచ్చే హ్యాంగోవర్ వంటి తీవ్రమైన అలసట, తలనొప్పిని ఎదుర్కొంటారు. అంతేకాదు, నిద్రలేమి వల్ల మెదడు జ్ఞాపకాలను సరిగ్గా ప్రాసెస్ చేయలేక మతిమరుపు, పరధాన్యానికి దారితీస్తుంది.
నిద్ర సరిగ్గా లేకపోవడం వల్ల ఒత్తిడి, చిరాకు, హార్మోన్ల హెచ్చుతగ్గులు ఏర్పడతాయి. ఇది దంపతుల మధ్య అనవసరమైన గొడవలకు, సంబంధాలలో దూరం పెరగడానికి కూడా కారణమవుతోంది.
గురకను ప్రాథమిక దశలోనే కొన్ని సహజ మార్పులతో నియంత్రించవచ్చు. అధిక బరువు వల్ల గొంతు వద్ద ఉండే కొవ్వు శ్వాసనాళాన్ని ఇరుకుగా చేస్తుంది, కాబట్టి బరువు తగ్గడం ద్వారా గురకను అదుపు చేయవచ్చు. వెల్లకిలా కాకుండా పక్కకు తిరిగి పడుకోవడం, రాత్రిపూట ఆల్కహాల్ తీసుకోకపోవడం వంటివి కూడా గురక తీవ్రతను తగ్గిస్తాయి.
ఒక్కోసారి గురక అనేది అబ్స్ట్రక్టివ్ స్లీప్ అప్నియా (నిద్రలో అకస్మాత్తుగా శ్వాస ఆగిపోయే ప్రమాదకర శ్వాసకోశ సమస్య)కు సంకేతం కావచ్చు. నిద్రలో ఊపిరాడక ఉలిక్కిపడి లేవడం వంటి లక్షణాలు కనిపిస్తే నిర్లక్ష్యం చేయకుండా, ఈఎన్టీ (చెవి, ముక్కు, గొంతు వైద్య నిపుణులు) లేదా స్లీప్ మెడిసిన్ డాక్టర్లను సంప్రదించి పరీక్షలు చేయించుకోవాలి.
