మలయాళంలో ఫాజిల్ దర్శకత్వంలో వచ్చిన సినిమా హక్కులను నిర్మాత GV నారాయణరావు కొనుగోలు చేశారు. ఈ కథను చిరంజీవికి వినిపించగా, అందులో పాటలు, ఫైట్లు లేకపోవడంతో ఆయన మొదట నటించేందుకు సంశయించారు. అయితే, ఒక మూగ పిల్లాడిని కాపాడే త్యాగం చిరంజీవికి మంచి పేరు తెస్తుందని నారాయణరావు నచ్చజెప్పడంతో ఆయన అంగీకరించారు.
అయితే, చిరంజీవి బాంబేలో షూటింగ్లో ఉన్న సమయంలో ఊహించని మలుపు చోటుచేసుకుంది. నారాయణరావు భాగస్వామి హరిప్రసాద్, అదే మలయాళ చిత్రానికి డబ్బింగ్ హక్కులు కొని, కృష్ణం రాజు హీరోగా కోదండరామిరెడ్డి దర్శకత్వంలో పసివాడి ప్రాణం పేరుతోనే సినిమాను ప్రారంభించారు. తాను లక్ష రూపాయలు పెట్టి హక్కులు కొన్నానని, ఇలా చేయడం అన్యాయమని నారాయణరావు భావించారు.
ఈ విషయంపై నారాయణరావు అల్లు అరవింద్కు ఫోన్ చేసి మాట్లాడారు. చిరంజీవికి ఈ సినిమాపై ఆసక్తి లేదని అల్లు అరవింద్ మొదట భావించినా, నారాయణరావు పట్టువదలలేదు. చిరంజీవితోనే ఈ సినిమా తీయాలని, లేకపోతే కుదరదని ఆయన గట్టిగా చెప్పారు.
సినిమాను దక్కించుకోవడానికి నారాయణరావు వ్యూహాత్మక చర్యలు చేపట్టారు. కృష్ణం రాజు సినిమాలో కీలక పాత్రలు పోషించే నటీనటులను ఆయన అడ్డుకున్నారు. ఒరిజినల్ చిత్రంలో నటించిన ఐదేళ్ల బాలనటి సుజితను కేరళ నుంచి వస్తుండగా స్టేషన్లోనే కలిసి రూ. 5,000 ఇచ్చి ఒప్పందం చేసుకున్నారు.
అంతేకాదు, రఘువరన్, విలన్ అసిస్టెంట్ ఆంటోనీలను కూడా తన సినిమా కోసం నారాయణరావు బుక్ చేసుకున్నారు. ఈ నటులు లేకపోతే సినిమాకు ఎమోషన్ ఉండదని ఆయన గ్రహించారు. చిరంజీవి తిరిగి రాగానే, అల్లు అరవింద్ ద్వారా కోదండరామిరెడ్డికి ఫోన్ చేయించి, నారాయణరావు హక్కులు కొన్న విషయాన్ని స్పష్టం చేశారు.
దీంతో కోదండరామిరెడ్డి సినిమా నుంచి తప్పుకోవడంతో, పసివాడి ప్రాణం చిత్రం చిరంజీవి చేతికి వచ్చింది. ఈ చిత్రం బాక్సాఫీస్ వద్ద ఘన విజయం సాధించి, చిరంజీవిని సుప్రీమ్ స్టార్ స్థాయి నుంచి మెగాస్టార్ స్థాయికి చేర్చింది.
