ఫోన్లో వందల కాంటాక్ట్లు ఉన్నా, మనసు విప్పి మాట్లాడుకోవడానికి ఎవరూ లేని నేటి ఒంటరి జీవితాల నేపథ్యంలో ‘హ్యాపీ జర్నీ’ సినిమాను రూపొందించారు. గుత్తా ప్రొడక్షన్, కమలాకర్ ఫిల్మ్ కార్పొరేషన్ బ్యానర్లపై బాలాజీ గుత్తా, కౌశిక్ రెడ్డి ఈ చిత్రాన్ని నిర్మించారు. ఈ సినిమాతో అభిరామ్ నాయుడు దర్శకుడిగా పరిచయమవుతున్నారు.
హైదరాబాద్లో విడుదలైన ఈ సినిమా ట్రైలర్, ఒక టూరిస్ట్ గైడ్ సాయంతో ఏడుగురు మహిళలు యూరప్ వెళ్లడంతో మొదలవుతుంది. వేర్వేరు వయసులు, నేపథ్యాలు ఉన్న వీరు ప్రయాణంలో గొడవలు పడినా, చివరికి ఒకరినొకరు ఎలా అర్థం చేసుకున్నారనేదే కథాంశం. సీనియర్ నటి అన్నపూర్ణమ్మ, ఆమని, యాంకర్ ఝాన్సీ, పాయల్ రాధాకృష్ణ, జినీషా అలిశెట్టి, రూపా శ్రీనివాస్, సునైనా ఇందులో ప్రధాన పాత్రలు పోషించారు.
ట్రైలర్ లాంచ్ ఈవెంట్లో దర్శకుడు అభిరామ్ నాయుడు మాట్లాడుతూ, జనాభా పెరుగుతున్నా మనుషుల మధ్య బంధాలు తగ్గుతున్నాయని ఆవేదన వ్యక్తం చేశారు. బాధలో ఉన్నప్పుడు ఫోన్ చేయడానికి కూడా ఎవరూ లేని పరిస్థితిని ఈ సినిమా ప్రతిబింబిస్తుందని ఆయన పేర్కొన్నారు. ఇది కేవలం మహిళల సినిమా మాత్రమే కాదని, కుటుంబమంతా కలిసి చూడాల్సిన చిత్రమని నటీమణులు పాయల్, రూప, జినీషా, సునైనా తెలిపారు.
ఈ చిత్రానికి మణికందన్ సుబ్రమణియన్ సినిమాటోగ్రఫీ అందించగా, యూరప్ అందాలను ఆయన కెమెరాలో అద్భుతంగా బంధించారు. శేఖర్ చంద్ర సంగీతం అందించగా, ఛోటా కె. ప్రసాద్ ఎడిటర్గా, బ్రహ్మ కడలి ప్రొడక్షన్ డిజైనర్గా పనిచేశారు. సరికొత్త ఫన్, ఎమోషన్స్తో రూపొందిన ఈ సినిమా సెప్టెంబర్ 18న థియేటర్లలో విడుదల కానుంది.
