మణుగూరు మండలం బుడుగుల గ్రామంలో పద్దం మాసయ్య, భీమయ్య అనే ఇద్దరు వృద్ధులను స్థానికులు కర్రలతో కొట్టి చంపారు. వీరు మంత్రాలు చేస్తూ గ్రామస్తులను ఇబ్బంది పెడుతున్నారని, వీరి పూజల వల్లే గ్రామంలో చాలామంది చనిపోతున్నారని కొందరు గ్రామస్తులు అనుమానించారు. ఈ కక్షతోనే నెల రోజుల క్రితం దుండగులు వారిని హత్య చేసి, అడవిలోని ఒక చెక్‌డ్యామ్ వద్ద పాతిపెట్టారు.
ఈ హత్యలపై మృతుడు భీమయ్య కూతురు పోలీసులకు ఫిర్యాదు చేయడంతో అసలు విషయం బయటపడింది. ఈ ఘటనలో ఐదుగురు వ్యక్తులు పాల్గొన్నట్లు మణుగూరు సీఐ నాగబాబు తెలిపారు. ప్రస్తుతం నిందితుల కోసం పోలీసులు గాలింపు చర్యలు ముమ్మరం చేశారు.
ఈ హత్యల తర్వాత అదే గ్రామంలో మరో విషాదం చోటుచేసుకుంది. హత్యకు గురైన పద్దం మాసయ్య కుమారుడు రాంబాబు, అతని భార్య సునీత తమను కూడా చంపేస్తారనే భయంతో ఆత్మహత్యకు పాల్పడ్డారు. తమ తండ్రిని చంపినవారే తమను కూడా లక్ష్యంగా చేసుకుంటారని వారు తీవ్ర ఆందోళన చెందారు.
నిన్న రాత్రి రాంబాబు, సునీత ఇప్పసారాయిలో పురుగుల మందు కలుపుకుని తాగారు. స్థానికులు వారిని గమనించి వెంటనే ప్రభుత్వ ఆసుపత్రికి తరలిస్తుండగా మార్గమధ్యలోనే సునీత మరణించింది. ఆసుపత్రిలో చికిత్స పొందుతూ రాంబాబు కూడా ప్రాణాలు కోల్పోయాడు.
ఈ వరుస మరణాలపై పోలీసులు కేసు నమోదు చేసి దర్యాప్తు చేస్తున్నారు. మూఢనమ్మకాల కారణంగా ఇద్దరు హత్యకు గురికాగా, ప్రాణభయంతో మరో ఇద్దరు దంపతులు ఆత్మహత్య చేసుకోవడంతో ఆ గ్రామంలో విషాదం నెలకొంది.
