గుజరాత్లోని వడోదర శివారు ప్రాంతంలో ఉన్న ఒక గ్యారేజీ వద్ద ఈ ఘటన జరిగింది. రిపేరు కోసం పార్క్ చేసిన ప్రైవేటు ట్రావెల్స్ బస్సు వద్ద బుధవారం సాయంత్రం దివ్వేష్ రాత్వ అనే ఏడేళ్ల బాలుడు ఆడుకుంటుండగా ప్రమాదం జరిగింది. బస్సు ఆటోమేటిక్ పద్ధతిలో పనిచేసే హైడ్రాలిక్ డోర్ (ద్రవ పీడనంతో పనిచేసే తలుపు) మధ్యలో బాలుడి తల ఇరుక్కుపోయింది.
ఇంటి వద్ద ఉన్న గ్యారేజీ యజమాని సీసీటీవీ కెమెరా ద్వారా ఈ దృశ్యాన్ని గమనించాడు. వెంటనే ఇద్దరు సిబ్బంది వాహనం వద్దకు చేరుకుని, ఆ హైడ్రాలిక్ డోర్ను గట్టిగా తోయడంతో బాలుడు కిందపడ్డాడు. అప్పటికే తీవ్రంగా గాయపడిన బాలుడిని ఆసుపత్రికి తరలించగా, పరీక్షించిన డాక్టర్లు అప్పటికే మరణించినట్లు నిర్ధారించారు.
ఈ ఘటనపై సమాచారం అందుకున్న పోలీసులు సంఘటనా స్థలానికి చేరుకుని బాలుడి మృతదేహాన్ని పోస్ట్మార్టం (మరణానికి గల కారణాలను తెలుసుకోవడానికి చేసే వైద్య పరీక్ష) కోసం తరలించారు. గ్యారేజీ వద్ద ఉన్న సీసీటీవీ ఫుటేజీని పోలీసులు పరిశీలించారు. అయితే, బాలుడి తల ఇరుక్కోవడానికి ముందు, ఆ తర్వాత దృశ్యాలు మాత్రమే రికార్డ్ అయ్యాయి.
మధ్యలో జరిగిన సంఘటనకు సంబంధించిన దృశ్యాలు రికార్డ్ కాకపోవడంపై పోలీసులు పలు అనుమానాలు వ్యక్తం చేస్తున్నారు. ఈ వీడియో క్లిప్ ప్రస్తుతం సోషల్ మీడియాలో విస్తృతంగా వ్యాపించింది. బాలుడి మరణంపై అన్ని కోణాల్లో దర్యాప్తు చేస్తున్నట్లు పోలీస్ అధికారి వెల్లడించారు.
