బూర్గంపహాడ్ మండలంలోని మోరంపల్లిబంజర్ సెక్టార్ పరిధిలో ఉన్న ఎంపీబంజరు-4 అంగన్వాడీ కేంద్రంలో పోషణ మాసోత్సవాలు జరిగాయి. ఈ కార్యక్రమంలో సెక్టార్ సూపర్వైజర్ స్వరాజ్యం పాల్గొని గర్భిణులు, బాలింతలకు ఆరోగ్య సూచనలు చేశారు.
ప్రభుత్వం అంగన్వాడీ కేంద్రాల ద్వారా అందించే పోషక విలువలతో కూడిన ఆహారాన్ని గర్భిణులు, తల్లులు క్రమం తప్పకుండా తీసుకోవాలని స్వరాజ్యం కోరారు. తల్లులు, బిడ్డల ఆరోగ్యాన్ని కాపాడుకోవడానికి ఈ ఆహారం ఎంతో అవసరమని ఆమె వివరించారు.
పుట్టబోయే బిడ్డ ఆరోగ్యంగా ఉండాలంటే గర్భిణులు పోషకాహారం తీసుకోవడం తప్పనిసరి అని ఆమె స్పష్టం చేశారు. అంగన్వాడీ కేంద్రాల్లో అందుబాటులో ఉన్న సేవలను గర్భిణులు, తల్లులు పూర్తిగా సద్వినియోగం చేసుకోవాలని సూచించారు.
ఈ కార్యక్రమంలో అంగన్వాడీ టీచర్ ధనలక్ష్మితో పాటు స్థానిక తల్లులు, పిల్లలు, గర్భిణులు పాల్గొన్నారు. పోషకాహారం తీసుకోవడం ద్వారా ఆరోగ్యవంతమైన సమాజ నిర్మాణానికి సహకరించాలని అధికారులు కోరారు.
