చిన్న, సన్నకారు రైతుల కోసం కేంద్ర ప్రభుత్వం పీఎం కిసాన్ (PM Kisan) పథకాన్ని అమలు చేస్తోంది. ఈ పథకం ద్వారా ఏడాదికి రూ. 6 వేల ఆర్థిక సాయాన్ని రూ. 2 వేల చొప్పున మూడు విడతలుగా రైతుల బ్యాంక్ ఖాతాల్లో ప్రభుత్వం జమ చేస్తుంది. ప్రతి నాలుగు నెలలకు ఒకసారి ఈ నిధులను విడుదల చేస్తారు.
ఇప్పటివరకు 23 విడతల నగదును రైతులకు అందించగా, 24వ విడత నిధులను అక్టోబర్ 30న గుజరాత్ వేదికగా ప్రధాని మోదీ విడుదల చేయనున్నారు. ఈ పథకం ద్వారా లబ్ధి పొందాలంటే ఐదు ఎకరాల లోపు భూమి కలిగి ఉండాలి. ఐదు ఎకరాల కంటే ఎక్కువ భూమి ఉన్న రైతులకు ఈ పథకం వర్తించదు.
కుటుంబంలో ఇద్దరి పేర్లపై భూమి ఉన్నా, ఒకరికి మాత్రమే ఈ సాయం అందుతుంది. దరఖాస్తు చేసుకునే రైతులు ఆధార్ కార్డు, బ్యాంక్ పాస్ బుక్, పాస్ పోర్ట్ సైజు ఫొటోలు, పట్టాదారు పాస్ బుక్ వంటి పత్రాలను సిద్ధం చేసుకోవాలి.
ఆసక్తి ఉన్న రైతులు పీఎం కిసాన్ అధికారిక వెబ్‌సైట్ https://pmkisan.gov.in/ ను సందర్శించి 'న్యూ ఫార్మర్ రిజిస్ట్రేషన్' ఆప్షన్ ద్వారా దరఖాస్తు చేసుకోవచ్చు. వెబ్‌సైట్‌లో ఆధార్ నెంబర్, క్యాప్చా ఎంటర్ చేసి, మొబైల్‌కు వచ్చే ఓటీపీ (OTP) ద్వారా రిజిస్ట్రేషన్ ప్రక్రియను పూర్తి చేయాలి.
రిజిస్ట్రేషన్ సమయంలో రాష్ట్రం, జిల్లా, గ్రామం, బ్యాంక్ వివరాలతో పాటు భూమికి సంబంధించిన పత్రాలను అప్‌లోడ్ చేయాలి. రైతులు పీఎం కిసాన్ యాప్ ద్వారా కూడా దరఖాస్తు చేసుకునే అవకాశం ఉంది.
ఒకవేళ రిజిస్ట్రేషన్ నెంబర్ తెలియకపోతే, వెబ్‌సైట్‌లోని 'నో యువర్ రిజిస్ట్రేషన్ నెంబర్' ఆప్షన్ ఎంచుకోవాలి. అక్కడ రిజిస్ట్రేషన్ నెంబర్, క్యాప్చా ఎంటర్ చేసి ఓటీపీ ద్వారా వివరాలను తెలుసుకోవచ్చు.
