ముంబై వీధుల్లో పావ్ భాజీ, వడాపావ్లకు ఎంత క్రేజ్ ఉంటుందో, తవా పులావ్కు కూడా అంతే ఆదరణ ఉంది. పెద్ద ఇనుప పెనంపై మసాలాలు, కూరగాయలు, అన్నాన్ని కలిపి హై ఫ్లేమ్పై వేయించడం వల్ల వచ్చే ప్రత్యేకమైన సువాసన, రుచి ఈ వంటకానికి ప్రాణం. అదే రుచిని ఇప్పుడు మీ ఇంట్లోనే సులభంగా పొందవచ్చు.
ముందుగా వెడల్పాటి పాన్ లేదా ఐరన్ తవాను స్టవ్ మీద పెట్టి, అందులో కొద్దిగా నూనె, బటర్ వేయాలి. బటర్ కరిగిన తర్వాత ఉల్లిపాయ ముక్కలు, అల్లం-వెల్లుల్లి పేస్ట్ వేసి పచ్చివాసన పోయే వరకు వేయించాలి. ఆపై టమోటాలు, క్యాప్సికమ్ ముక్కలను వేసి అవి మెత్తబడే వరకు మగ్గనివ్వాలి. ఇందులో ఉడికించిన బంగాళాదుంప ముక్కలు, పచ్చి బఠానీలు, కావాలనుకుంటే క్యారెట్ ముక్కలను జోడించి బాగా కలపాలి.
ఈ పులావ్కు అసలైన రుచిని ఇచ్చేది మసాలాలే. కూరగాయల మిశ్రమంలో పసుపు, కారం, ఉప్పు, రెండు చెంచాల పావ్ భాజీ మసాలా వేసి కలపాలి. మసాలాలు మాడకుండా ఉండేందుకు కొద్దిగా నీళ్లు చల్లి, నూనె లేదా బటర్ పైకి తేలే వరకు ఉడికించాలి. ఆ తర్వాత ముందుగా ఉడికించి చల్లార్చిన బాస్మతి అన్నాన్ని ఇందులో వేయాలి.
చివరగా అన్నం ముక్కలు కాకుండా మసాలా అంతా పట్టేలా జాగ్రత్తగా టాస్ చేస్తూ, హై ఫ్లేమ్పై రెండు నిమిషాలు వేయించాలి. సన్నగా తరిగిన కొత్తిమీర చల్లి, కొద్దిగా నిమ్మరసం పిండుకుంటే వేడివేడి తవా పులావ్ సిద్ధమవుతుంది. దీనిని ఉల్లిపాయ రాయ్తా, పాపడ్తో కలిపి తింటే లంచ్ లేదా డిన్నర్కు చాలా బాగుంటుంది.
