నిర్మల్ జిల్లాలో అస్లాం ఖాన్ హత్యకు సుపారీ తీసుకున్న ముఠాను పోలీసులు అరెస్ట్ చేశారు. జిల్లా ఎస్పీ డా. జి. జానకి షర్మిల ఆదేశాల మేరకు రెండు ప్రత్యేక పోలీసు బృందాలు ఈ కేసులో దర్యాప్తు చేపట్టాయి. సాంకేతిక ఆధారాలు, కాల్ డేటా విశ్లేషణ, సీసీటీవీ ఫుటేజీల సాయంతో నిందితులను పోలీసులు అదుపులోకి తీసుకున్నారు.
ఈ హత్యకు అస్లాం ఖాన్ సవితి తల్లి అన్వరీ బేగం ప్రధాన కుట్రదారుగా వ్యవహరించినట్లు విచారణలో వెల్లడైంది. అన్వరీ బేగం, అస్లాం ఖాన్తో అక్రమ సంబంధం కొనసాగిస్తోంది. అయితే, తాను వివాహం చేసుకుని కుటుంబ జీవితాన్ని గడపాలని అస్లాం ఖాన్ నిర్ణయించుకోవడంతో గొడవలు మొదలయ్యాయి.
వివాహం చేసుకుంటే చంపేస్తానని అన్వరీ బేగం గతంలోనే అస్లాం ఖాన్ను హెచ్చరించింది. తమ సంబంధం ఇలాగే కొనసాగాలని, అందుకు అవసరమైన ఆర్థిక సహాయం చేస్తానని ఆమె ఒత్తిడి తెచ్చింది. ఈ నేపథ్యంలోనే ఆమె సుపారీ ఇచ్చి హత్య చేయించినట్లు పోలీసులు గుర్తించారు.
నిందితుల నుంచి నేరానికి వాడిన స్కార్పియో కారు, ఒక మోటార్ సైకిల్, రెండు కత్తులు, ఐదు సెల్ఫోన్లను పోలీసులు స్వాధీనం చేసుకున్నారు. నిందితులపై చట్టపరమైన చర్యలు తీసుకునేందుకు పోలీసులు దర్యాప్తును కొనసాగిస్తున్నారు.
