చిప్స్ ప్యాకెట్ తెరవగానే అందులో సగానికి పైగా ఖాళీ ఉండటం వినియోగదారులకు నిరాశ కలిగించే అంశమే. అయితే, ప్యాకెట్ నిండుగా కనిపించేలా చేసి వినియోగదారులను భ్రమలో ఉంచడం కోసం కంపెనీలు ఇలా చేయడం లేదు. ప్యాకెట్ లోపల ఉండే ఆ ఖాళీ ప్రదేశం చిప్స్ నాణ్యతను కాపాడటంలో కీలక పాత్ర పోషిస్తుంది.
ప్యాకెట్లను సీల్ చేసే ముందు తయారీదారులు అందులోకి నైట్రోజన్ గ్యాస్ను నింపుతారు. ఇది మనం పీల్చే సాధారణ గాలి కాదు. నైట్రోజన్ ఒక ‘ఇనెర్ట్ గ్యాస్’ కావడంతో, ఇది చిప్స్లోని నూనెలతో రసాయన చర్య జరపదు. ఆక్సిజన్ స్థానంలో నైట్రోజన్ను నింపడం వల్ల చిప్స్ ఎక్కువ కాలం తాజాగా, క్రిస్పీగా ఉంటాయి.
రవాణా సమయంలో చిప్స్ విరిగిపోకుండా ఉండేందుకు ఈ గ్యాస్ ఒక కుషన్ లాగా పనిచేస్తుంది. ఫ్యాక్టరీ నుండి సూపర్ మార్కెట్ షెల్ఫ్లకు చేరే వరకు అనేక చేతులు మారే క్రమంలో, ఈ గ్యాస్ ప్యాకెట్పై పడే ఒత్తిడిని తట్టుకుని చిప్స్ నలిగిపోకుండా కాపాడుతుంది. ఈ రక్షణ లేకపోతే, ప్యాకెట్ ఓపెన్ చేసేసరికి చిప్స్ పిండిగా మారిపోయే అవకాశం ఉంది.
ప్యాకెట్ పరిమాణం కంటే అందులోని పదార్థం బరువుకే వినియోగదారులు డబ్బు చెల్లిస్తున్నారని కంపెనీలు స్పష్టం చేస్తున్నాయి. ప్యాకెట్పై లోపల ఉన్న చిప్స్ ఖచ్చితమైన బరువును స్పష్టంగా ముద్రిస్తారు. వివిధ రకాల చిప్స్ ఆకారాలు, పరిమాణాలను బట్టి ప్యాకేజింగ్ డిజైన్ మారుతుంటుంది కాబట్టి, ప్యాకెట్ ఖాళీని చూసి నిరాశ చెందాల్సిన అవసరం లేదని తయారీదారులు పేర్కొంటున్నారు.
