ఒక వ్యక్తి పేరు, రూపం, స్వరం వంటి వ్యక్తిగత గుర్తింపును ఇతరులు వాణిజ్య ప్రయోజనాల కోసం వాడుకోకుండా ఉండే హక్కును 'పర్సనాలిటీ రైట్స్' అంటారు. ఈ హక్కులను కాపాడుకోవడానికి అమితాబ్ బచ్చన్ దాఖలు చేసిన పిటిషన్‌పై ఢిల్లీ హైకోర్టు తుది ఉత్తర్వులు జారీ చేసింది. నవంబర్ 2022 నుంచి ఈ కేసు విచారణలో ఉంది.
ఈ కేసులో రజత్ నాగి, మనోజ్ పబ్లికేషన్స్, తమటినా, మహేష్ పటేల్ అనే నలుగురు ప్రతివాదులు అమితాబ్ హక్కులను అంగీకరిస్తూ సెటిల్మెంట్ చేసుకున్నారు. దీనివల్ల 'అమితాబ్ బచ్చన్ వీడియో కాల్' యాప్ తొలగింపు, క్విజ్ బుక్ ప్రచురణ నిలిపివేత, పోస్టర్ల విక్రయాల ఆపడం వంటి చర్యలు అమల్లోకి వచ్చాయి. అలాగే, amitabhbachchan.in అనే వెబ్‌సైట్ అడ్రస్ (డొమైన్ పేరు)ను కూడా తొలగించారు.
గుర్తు తెలియని వ్యక్తులు కూడా అమితాబ్ గుర్తింపును దుర్వినియోగం చేయకుండా కోర్టు రక్షణ కల్పించింది. చట్టపరమైన భాషలో ఇలాంటి అజ్ఞాత వ్యక్తులను 'జాన్ డోస్' (John Does) అని పిలుస్తారు. వీరు కూడా అమితాబ్ అనుమతి లేకుండా ఆయన పేరును వాడకూడదని కోర్టు ఆదేశించింది.
మిగిలిన ప్రతివాదులు కోర్టుకు హాజరు కాకపోవడంతో, విచారణ అవసరం లేని కేసుగా పరిగణించి కోర్టు సమ్మరీ జడ్జిమెంట్ ఇచ్చింది. అంటే, సాక్ష్యాధారాల విచారణ లేకుండానే కోర్టు నేరుగా తీర్పును వెలువరించింది. భవిష్యత్తులో ఎవరైనా ఇలాంటి దుర్వినియోగానికి పాల్పడితే, కొత్తగా కేసు వేసే స్వేచ్ఛను కోర్టు అమితాబ్‌కు ఇచ్చింది.
