తెలుగులో తొమ్మిది సీజన్లు విజయవంతంగా పూర్తి చేసుకున్న బిగ్ బాస్ రియాలిటీ షో పదో సీజన్ కోసం సిద్ధమవుతోంది. ల్యాండ్ మార్క్ సీజన్ కావడంతో కొత్త స్ట్రాటజీలు, సరికొత్త గేమ్స్ మరియు టాస్కులతో ఈసారి షోను మరింత గ్రాండ్గా నిర్వహించనున్నారు. ఆగస్టు చివరి వారం లేదా సెప్టెంబర్ మొదటి వారంలో ఈ సీజన్ ప్రారంభం కానుండగా, కంటెస్టెంట్ల ఎంపికపై సోషల్ మీడియాలో భారీ చర్చ జరుగుతోంది.
పల్లవి గౌడ, తేజస్విని గౌడ, ఎక్స్ప్రెస్ హరి, జబర్దస్త్ నూకరాజు, రాకింగ్ రాకేష్, సందీప్ భార్య జ్యోతి, నందూస్ వరల్డ్ (నందు), రాయల్ ఎంసీ రమణ, శివ్, చంద్రహాస్, కడలి సత్యనారాయణ తదితరులు హౌస్లోకి వెళ్లే అవకాశం ఉందని ప్రచారం సాగుతోంది. అయితే, గత కొన్నేళ్లుగా ఒక జబర్దస్త్ బ్యూటీకి నిర్వాహకుల నుంచి పిలుపులు వస్తున్నా, ఆమె మాత్రం నిరాకరిస్తూనే ఉంది. ఈసారి కూడా భారీ రెమ్యునరేషన్ ఆఫర్ చేసినా, ఆమె మరోసారి నో చెప్పింది.
ఆమె మరెవరో కాదు, 'వెంకట్రామయ్య గారి మనవరాలు' సినిమా హీరోయిన్ సత్యశ్రీ. తాజాగా ఓ ఇంటర్వ్యూలో మాట్లాడిన ఆమె, గత మూడు సీజన్లుగా తనకు బిగ్ బాస్ నుంచి కళ్లు చెదిరే రెమ్యునరేషన్ ఆఫర్లు వస్తున్నట్లు వెల్లడించింది. అయితే, తనకు కుటుంబమే ప్రధానమని, ప్రస్తుతం తాను తల్లిదండ్రులను చూసుకుంటున్నానని స్పష్టం చేసింది. ఇంట్లో పెద్దదిగా ఉన్న తనకు తల్లిదండ్రుల బాధ్యతలు చూసే సామర్థ్యం సోదరికి లేదని, వారిని వదిలిపెట్టి షోకు వెళ్లడం తనకు కష్టంగా ఉంటుందని ఆమె వివరించింది.
తన తల్లిదండ్రులు హ్యాపీగా ఉండాలనే ఉద్దేశంతోనే సొంతూరులో వారి కోసం ప్రత్యేకంగా ఇల్లు కట్టించినట్లు సత్యశ్రీ తెలిపింది. పెళ్లి చేసుకుని వెళ్లిపోయాక కూడా వారికి ఆధారంగా ఉండాలనే ఆలోచనతోనే ఈ నిర్ణయం తీసుకున్నట్లు ఆమె పేర్కొంది. కుటుంబ బాధ్యతల కారణంగానే చాలా ఏళ్లుగా బిగ్ బాస్ ఆఫర్లను తిరస్కరిస్తున్నానని, ప్రస్తుతం తన సినిమా ప్రమోషన్లు మరియు కుటుంబంపైనే దృష్టి పెట్టినట్లు ఆమె చెప్పుకొచ్చింది.
