చెన్నై కుటుంబ సంక్షేమ న్యాయస్థానం జయం రవికి అనుకూలంగా మధ్యంతర తీర్పును వెలువరించింది. తన భార్య ఆర్తి నెలకు రూ.40 లక్షల తాత్కాలిక భరణం కావాలని కోరగా, ఆ విజ్ఞప్తిని న్యాయస్థానం తిరస్కరించింది. విడాకుల కేసులో తుది తీర్పు వచ్చే వరకు నెలకు రూ.3 లక్షలు మాత్రమే చెల్లించాలని జయం రవిని ఆదేశించింది.
భరణం విషయంలోనే కాకుండా, పిల్లల విషయంలో కూడా జయం రవికి కోర్టు ఊరటనిచ్చింది. తన ఇద్దరు కుమారులను ఎటువంటి ఆంక్షలు లేకుండా కలిసే హక్కు ఆయనకు ఉందని న్యాయస్థానం స్పష్టం చేసింది. దీంతో పిల్లలను చూసేందుకు ఉన్న అడ్డంకులు తొలగిపోయాయి.
గత కొంతకాలంగా జయం రవి, ఆర్తి మధ్య విడాకుల వ్యవహారం కోర్టులో నడుస్తోంది. ఈ కేసులో భరణం, పిల్లల సంరక్షణ వంటి అంశాలపై ఇరువర్గాలు వాదనలు వినిపిస్తున్నాయి. తాజా ఉత్తర్వులతో జయం రవికి ఆర్థికంగా కొంత ఉపశమనం లభించినట్లయింది.
ప్రస్తుతం విడాకుల కేసు విచారణ దశలోనే ఉంది. తుది తీర్పు వెలువడే వరకు ఈ వ్యవహారంపై మరిన్ని కీలక నిర్ణయాలు వచ్చే అవకాశం ఉంది. ఈ కేసులో గాయని కెనీషా ఫ్రాన్సిస్ పేరు కూడా ప్రచారంలో ఉండటంతో, తుది తీర్పుపై సర్వత్రా ఆసక్తి నెలకొంది.
