జూలై 19న లార్డ్స్ మైదానంలో జరిగిన నిర్ణయాత్మక మూడో వన్డేలో ఇంగ్లాండ్ బ్యాటర్లు చెలరేగిపోయారు. భారత బౌలర్లను ఉతికేస్తూ నిర్ణీత 50 ఓవర్లలో 3 వికెట్ల నష్టానికి 387 పరుగుల భారీ స్కోరును ఇంగ్లాండ్ నమోదు చేసింది. 1975 జూన్లో భారత్పైనే ఇంగ్లాండ్ చేసిన 334 పరుగుల రికార్డును 51 ఏళ్ల తర్వాత జట్టు బ్యాటర్లు తిరగరాశారు.
ఈ మ్యాచ్లో ఓపెనర్ బెన్ డకెట్ 141 పరుగులతో అద్భుత ఇన్నింగ్స్ ఆడాడు. 1979లో వివియన్ రిచర్డ్స్ నెలకొల్పిన 138 పరుగుల రికార్డును అధిగమించి, లార్డ్స్లో అత్యధిక వ్యక్తిగత వన్డే స్కోరు సాధించిన బ్యాటర్గా డకెట్ నిలిచాడు. మరోవైపు జో రూట్ వరుసగా ఆరోసారి 50కి పైగా పరుగులు సాధించి ఇంగ్లాండ్ తరఫున కొత్త చరిత్ర సృష్టించగా, జోస్ బట్లర్ 13 బంతుల్లోనే 41 పరుగులు చేసి లిస్ట్-ఏ క్రికెట్లో తన 350వ సిక్సర్ను పూర్తి చేసుకున్నాడు.
భారత బౌలర్ల ప్రదర్శన నిరాశపరిచింది. గుర్నూర్ బ్రార్ 10 ఓవర్లలో 97 పరుగులు ఇచ్చి లార్డ్స్ చరిత్రలోనే అత్యధిక పరుగులు సమర్పించుకున్న బౌలర్గా నిలిచాడు. అర్ష్దీప్ సింగ్ 72 పరుగులు ఇచ్చి వికెట్లేమీ తీయలేకపోయారు. ప్రసిద్ధ్ కృష్ణ 2 వికెట్లు తీసినప్పటికీ, ఇంగ్లాండ్ పరుగుల వేగాన్ని అడ్డుకోలేకపోయారు.
ఈ మ్యాచ్లో ఇంగ్లాండ్ జట్టు తొలి రెండు వికెట్లకు సెంచరీ భాగస్వామ్యాలను నమోదు చేసింది. లార్డ్స్ మైదానంలో ఒకే ఇన్నింగ్స్లో మొదటి రెండు వికెట్లకు 100కు పైగా పరుగుల భాగస్వామ్యం నమోదు కావడం ఇదే మొదటిసారి.
