తైవాన్లో విధ్వంసం సృష్టించిన డాల్ఫిన్ తుఫాను ప్రస్తుతం చైనా తూర్పు తీరం వైపు వేగంగా దూసుకొస్తోంది. గంటకు 162 కిలోమీటర్ల గరిష్ట వేగంతో వీస్తున్న ఈ గాలుల కారణంగా చైనాలోని జెజియాంగ్, ఫుజియాన్ ప్రావిన్సులలో అధికారులు హై-అలర్ట్ ప్రకటించారు. ఆదివారం సాయంత్రానికి ఈ తుఫాను తీరాన్ని దాటే అవకాశం ఉందని వాతావరణ శాఖ అంచనా వేస్తోంది.
తుఫాను ముప్పు పొంచి ఉండటంతో షాంఘైలోని హాంగ్కియావో, పుడాంగ్ విమానాశ్రయాలు తమ షెడ్యూల్డ్ విమానాల్లో సుమారు 60 శాతాన్ని రద్దు చేశాయి. దీంతో ఆదివారం ఒక్కరోజే 1,300కు పైగా విమాన సర్వీసులు నిలిచిపోయాయి. జెజియాంగ్ ప్రావిన్స్లో ఫెర్రీలు, క్రూయిజ్ నౌకల రాకపోకలతో సహా అన్ని రకాల జల రవాణా కార్యకలాపాలను అధికారులు నిలిపివేశారు.
ప్రమాదకర ప్రాంతాల్లో నివసిస్తున్న ప్రజలను సురక్షిత ప్రాంతాలకు తరలించే ప్రక్రియను ప్రభుత్వం వేగవంతం చేసింది. తైజౌ నగరంలో 3,90,000 మందిని, షాంఘైలోని ముప్పు ఉన్న ప్రాంతాల నుంచి 30,000 మందికి పైగా ప్రజలను అధికారులు ఇప్పటికే తరలించారు. రాబోయే రోజుల్లో కొన్ని ప్రాంతాల్లో 200 నుంచి 400 మిల్లీమీటర్ల వర్షపాతం నమోదయ్యే అవకాశం ఉందని, దీనివల్ల వరదలు, కొండచరియలు విరిగిపడే ప్రమాదం ఉందని అధికారులు హెచ్చరించారు.
