అమెరికా విమానాశ్రయాలలో ప్రయాణికులను ICE ఏజెంట్లు అకస్మాత్తుగా అదుపులోకి తీసుకుంటున్న ఘటనలు పెరుగుతున్నాయని ఇమ్మిగ్రేషన్ న్యాయవాదులు పేర్కొన్నారు. అధ్యక్షుడు డొనాల్డ్ ట్రంప్ బహిష్కరణ ఎజెండాను అమలు చేసే క్రమంలో, రోజుకు దాదాపు 2,000 అరెస్టుల లక్ష్యాన్ని చేరుకోవాలని ఫెడరల్ ఏజెన్సీపై ఒత్తిడి ఉంది. ఈ నేపథ్యంలో విమానాశ్రయాలను అరెస్టులకు వేదికగా మార్చుకుంటున్నట్లు సమాచారం.
ఇమ్మిగ్రేషన్ అటార్నీ జో మోరావెక్ తెలిపిన వివరాల ప్రకారం, ఈ నెలలో ఒక మహిళ తన తండ్రి అంత్యక్రియల కోసం టెక్సాస్కు వెళ్తుండగా వాషింగ్టన్, DC-ఏరియా విమానాశ్రయంలో నిర్బంధించబడింది. ఆమె చట్టబద్ధంగా అమెరికాలోకి ప్రవేశించి ఆశ్రయం కోసం దరఖాస్తు చేసుకున్నప్పటికీ, ప్రస్తుతం వర్జీనియాలో నిర్బంధంలో ఉంది. చికాగో విమానాశ్రయంలో కూడా తన క్లయింట్ను ICE అధికారులు అదుపులోకి తీసుకున్నారని ఆయన వెల్లడించారు.
విమానాశ్రయాలలో అరెస్టులు చేయడం ICE ఏజెంట్లకు సులభతరమని మాజీ యాక్టింగ్ ICE డైరెక్టర్ జాన్ శాండ్వెగ్ వివరించారు. ట్రాన్స్పోర్టేషన్ సెక్యూరిటీ అడ్మినిస్ట్రేషన్ (TSA) ద్వారా ప్రయాణీకుల సమాచారం ముందే అందుబాటులో ఉండటం, ప్రయాణికులు నిరాయుధులుగా ఉండే సురక్షితమైన వాతావరణం ఉండటం వల్ల తక్కువ మంది ఏజెంట్లతోనే అరెస్టులు పూర్తి చేయవచ్చని ఆయన పేర్కొన్నారు. అయితే, విమానాశ్రయాలలో అమలు చర్యలు పెరగడంపై అమెరికన్ ఇమ్మిగ్రేషన్ లాయర్స్ అసోసియేషన్ అధ్యక్షుడు జెఫ్ జోసెఫ్ తీవ్ర అభ్యంతరం వ్యక్తం చేశారు.
ఈ పరిణామాల నేపథ్యంలో, పెండింగ్లో ఉన్న ఇమ్మిగ్రేషన్ దరఖాస్తులు కలిగిన వారు ప్రయాణాలు చేయడం ప్రమాదకరమని న్యాయవాదులు హెచ్చరిస్తున్నారు. మరోవైపు, విమానాశ్రయాలలో అరెస్టుల పెరుగుదలను హోమ్ల్యాండ్ సెక్యూరిటీ ప్రతినిధి ధృవీకరించలేదు. విదేశీయులు స్వచ్ఛందంగా దేశం విడిచి వెళ్లకపోతే, వారు చట్టవిరుద్ధంగా విమాన ప్రయాణాలు చేయకుండా చూసేందుకు తాము పనిచేస్తున్నామని మాత్రమే ఆ శాఖ ప్రకటించింది.
