ఆది, ప్రవీణ్, జోసెఫ్ అనే ముగ్గురు వ్యక్తుల మరణాల చుట్టూ ఈ కథ తిరుగుతుంది. చూడటానికి సాధారణ రోడ్డు ప్రమాదాల్లా కనిపించే ఈ మరణాలు, వాస్తవానికి పక్కా ప్రణాళికతో జరిగిన హత్యలని దర్యాప్తులో వెల్లడవుతుంది.
ఈ కేసును జై రామ్ అనే పోలీస్ అధికారి ఛేదిస్తారు. ఉద్యోగ విరమణకు కేవలం రెండు రోజుల సమయం మాత్రమే ఉన్న సమయంలో, ఆయన ఈ కేసును ఎలా పరిష్కరించారనేదే ఈ సిరీస్ ప్రధానాంశం. దర్యాప్తు సాగుతున్న కొద్దీ రాజకీయ అవినీతి, నేరస్థుల చీకటి ప్రపంచం బయటపడతాయని చిత్ర బృందం తెలిపింది.
మొత్తం ఆరు ఎపిసోడ్లు ఉండే ఈ సిరీస్ను ఉదయ భాను ప్రొడక్షన్స్ బ్యానర్పై మిడ్డే విజయేంద్ర మౌళి, ఉదయ భాను నిర్మించారు. ఇందులో శివాజీ రాజా, మేధా రెడ్డి, చరణ్ బాబు, రూప లక్ష్మి, రాధిక ప్రీతి, సూర్య, శ్రీజ కీలక పాత్రల్లో కనిపించనున్నారు.
ఈ సిరీస్కు నాగేంద్ర పిల్ల స్క్రీన్ ప్లే, డైలాగ్స్ అందించగా, నరేష్ కుమారన్ నేపథ్య సంగీతం సమకూర్చారు. కేవలం క్రైమ్ ఇన్వెస్టిగేషన్ మాత్రమే కాకుండా, మానవీయ భావోద్వేగాలను కూడా జోడించి రూపొందించినట్లు నిర్మాత ఉదయ భాను పేర్కొన్నారు.
ఈ సిరీస్ సెప్టెంబర్ 11 నుంచి ZEE5 ఓటీటీ (ఇంటర్నెట్ ద్వారా సినిమాలు, సిరీస్లను చూసే వేదిక)లో అందుబాటులోకి రానుంది. ఈ క్రైమ్ థ్రిల్లర్ వెనుక ఉన్న అసలు నిజాలు, చీకటి సామ్రాజ్యం ఏమిటో ఆ రోజున ప్రేక్షకులు చూడవచ్చు.
