Oppo తన కొత్త స్మార్ట్ఫోన్ Oppo A7 Pro విడుదల తేదీని అధికారికంగా ప్రకటించింది. ఈ ఫోన్ సెప్టెంబర్ 11న చైనా మార్కెట్లో అందుబాటులోకి రానుంది. భారీ బ్యాటరీతో పాటు ఫోన్ మన్నికకు (డ్యూరబిలిటీ) కంపెనీ ప్రాధాన్యత ఇస్తోంది.
ఈ ఫోన్ ధర చైనా మార్కెట్లో సుమారు 2,000 యువాన్లు ఉండవచ్చని అంచనా. ఇది భారత కరెన్సీలో దాదాపు రూ.28,000కు సమానం. అయితే, అధికారిక ధరను కంపెనీ సెప్టెంబర్ 11న వెల్లడించనుంది. ఇతర దేశాల్లో ఈ ఫోన్ ఎప్పుడు విడుదలవుతుందనే దానిపై ప్రస్తుతం స్పష్టత లేదు.
లీక్ అయిన వివరాల ప్రకారం, ఈ ఫోన్లో 6.57 అంగుళాల FHD+ OLED డిస్ప్లే ఉండవచ్చు. 120Hz రిఫ్రెష్ రేట్ (సెకనుకు 120 సార్లు స్క్రీన్ మారే సామర్థ్యం) ఉండటం వల్ల గేమింగ్, స్క్రోలింగ్ మరింత స్మూత్గా ఉంటాయి. ఈ వివరాలు PYE110 మోడల్ నంబర్తో TENAA (చైనా టెలికాం నియంత్రణ సంస్థ) వెబ్సైట్లో కనిపించాయి.
ప్రాసెసర్ విషయంలో Qualcomm Snapdragon 4 Gen 5 చిప్సెట్ ఉండవచ్చని సమాచారం. దీనికి 8GB RAM, 512GB స్టోరేజ్ తోడయ్యే అవకాశం ఉంది. మెమరీ కార్డ్ ద్వారా స్టోరేజ్ను 2TB వరకు పెంచుకునే వెసులుబాటు కూడా ఉండవచ్చు.
కెమెరా విషయానికి వస్తే, వెనుక భాగంలో 50MP ప్రధాన కెమెరా, ముందు భాగంలో 8MP సెల్ఫీ కెమెరా ఉండనున్నాయి. ఫోన్ వెనుక కెమెరా మాడ్యూల్ హారిజాంటల్ డిజైన్లో ఉండవచ్చని లీక్లు చెబుతున్నాయి. ఇందులో ఇన్ఫ్రారెడ్ బ్లాస్టర్ (రిమోట్ కంట్రోల్గా పనిచేసే పరికరం) కూడా ఉండే అవకాశం ఉంది.
ఈ ఫోన్ అతిపెద్ద ఆకర్షణ 8000mAh బ్యాటరీ, దీనికి 80W వైర్డ్ ఫాస్ట్ ఛార్జింగ్ సపోర్ట్ ఉంటుంది. అలాగే, దుమ్ము, నీటి నుంచి రక్షణ కోసం IP69K రేటింగ్ (ఎలక్ట్రానిక్ పరికరాలు నీరు, దుమ్మును తట్టుకోగల సామర్థ్యాన్ని తెలిపే ప్రమాణం) ఉండవచ్చు. అయితే, ఈ ఫీచర్లన్నీ అధికారికంగా ధృవీకరించాల్సి ఉంది.
