తమిళనాడులోని సేలం జిల్లా మల్లముపంపట్టి గ్రామంలోని ఈ ఆలయం భక్తులను, పర్యాటకులను ఆకర్షిస్తోంది. ఇక్కడ దేవుళ్లతో పాటు గ్రహాంతరవాసి విగ్రహాన్ని ప్రతిష్టించి పూజలు నిర్వహిస్తున్నారు. సంప్రదాయ ఆధ్యాత్మికతకు భిన్నంగా కొత్త ఆచారాలతో ఈ ఆలయాన్ని నిర్మించారు.
స్థానిక ఆధ్యాత్మిక గురువు లోగనాథన్, అంటే సిద్ధర్ పాకియా ఈ ఆలయాన్ని ఏర్పాటు చేశారు. భూమి వెలుపల కూడా జీవం ఉందని, విశ్వంలోని జీవరాశులన్నీ ఒకదానితో ఒకటి అనుసంధానమై ఉన్నాయని ఆయన నమ్ముతారు. ఈ భావనను ప్రజలకు తెలియజేయడమే ఈ ఆలయ ప్రధాన ఉద్దేశమని ఆయన పేర్కొన్నారు.
ఈ ఆలయంలో 11 అడుగుల లోతులో భూగర్భ గర్భగుడి ఉంది. అక్కడ పొడవాటి తల, పెద్ద నల్లని కళ్లతో గ్రే ఏలియన్ ఆకృతిని పోలి ఉండే విగ్రహాన్ని ప్రతిష్టించారు. గ్రహాంతరవాసులు అత్యున్నత స్థాయి జీవులని, వారు మానవాళికి ఆధ్యాత్మిక అభివృద్ధి, శాంతి మార్గాలను చూపగలరని సిద్ధర్ పాకియా విశ్వసిస్తారు. శివుడి తొలి సృష్టుల్లో గ్రహాంతరవాసులు కూడా ఉన్నారని, వారికి అసాధారణ శక్తులు ఉంటాయని ఆయన చెబుతుంటారు.
భూగర్భ గర్భగుడిలో ఏలియన్ విగ్రహంతో పాటు శివుడు, పార్వతీ దేవి, మురుగన్, కాళీమాత, వారాహి అమ్మవారి విగ్రహాలు కూడా ఉన్నాయి. అయితే, ఈ ఆలయం ఏలియన్ల ఉనికిని శాస్త్రీయంగా నిరూపించదు. ఇవి పూర్తిగా వ్యక్తిగత ఆధ్యాత్మిక విశ్వాసాలు, పురాణాల వ్యాఖ్యానాలు మాత్రమేనని స్పష్టమవుతోంది.
