సౌత్ ఇండస్ట్రీలో సహజ నటనతో పేరు తెచ్చుకున్న విజయశాంతి, చాలా కాలం తర్వాత మళ్లీ సినిమాల్లో నటిస్తున్నారు. ఇటీవల ఒక ఇంటర్వ్యూలో తన కెరీర్ ప్రారంభ రోజులను, దర్శకుడు టి. కృష్ణతో ఉన్న అనుబంధాన్ని ఆమె వివరించారు.
సినిమా పరిశ్రమలో ఒక నటిగా హీరోలతో సమానమైన గుర్తింపు పొందడం చాలా కష్టమని విజయశాంతి చెప్పారు. అప్పట్లో కేవలం అందం కోసం మాత్రమే కాకుండా, యాక్షన్ సన్నివేశాల్లో కూడా రాణించడం తనకు పెద్ద సవాలుగా మారిందని ఆమె పేర్కొన్నారు.
గ్రాఫిక్స్ లేదా డూప్ల సాయం లేకుండానే 20 నుండి 30 అడుగుల ఎత్తు నుండి దూకడం వంటి సాహసాలు చేసినట్లు ఆమె తెలిపారు. ఇలాంటి రియలిస్టిక్ లుక్ కోసం ప్రాణాలకు తెగించి నటించానని విజయశాంతి గుర్తు చేసుకున్నారు.
తనలోని నటిని గుర్తించిన ఘనత దర్శకుడు టి. కృష్ణదేనని ఆమె చెప్పారు. ఆయన తనను ఎంతో ఆప్యాయంగా 'శాంతమ్మ' అని పిలిచేవారని, ఆయన దర్శకత్వంలో తాను వరుసగా ఆరు సినిమాల్లో నటించానని వెల్లడించారు.
టాలీవుడ్ చరిత్రలో విప్లవాత్మక చిత్రంగా నిలిచిన 'ప్రతిఘటన'లో అవకాశం రావడం తన కెరీర్లో పెద్ద మలుపు అని ఆమె తెలిపారు. అప్పట్లో తాను చాలా చిన్న వయస్కురాలిని కావడంతో, లెక్చరర్ పాత్రకు సరిపోనని చాలామంది విమర్శించినా టి. కృష్ణ తనపై నమ్మకంతో ఆ అవకాశం ఇచ్చారని ఆమె చెప్పారు.
చాలా కాలం సినిమాలకు దూరంగా ఉన్న విజయశాంతి, మహేష్ బాబు, అనిల్ రావిపూడి కాంబినేషన్లో వచ్చిన 'సరిలేరు నీకెవ్వరు' సినిమాతో రీఎంట్రీ ఇచ్చారు. ఇటీవల కళ్యాణ్ రామ్ నటించిన 'అర్జున్ సన్ ఆఫ్ వైజయంతి' చిత్రంలో కూడా ఆమె నటించారు.
