గన్నవరంలో నిర్వహించిన వైసీపీ విస్తృత స్థాయి సమావేశంలో వల్లభనేని వంశీ పార్టీ నాయకులు, కార్యకర్తలను ఉద్దేశించి మాట్లాడారు. స్థానిక సంస్థల ఎన్నికలను పార్టీని క్షేత్రస్థాయిలో బలోపేతం చేయడానికి ఒక కీలక అవకాశంగా వాడుకోవాలని ఆయన సూచించారు. గ్రామస్థాయి నుంచే బలమైన నాయకత్వాన్ని తయారు చేసుకోవాలని, తద్వారా అభ్యర్థుల విజయం కోసం ప్రతి గ్రామంలో పార్టీ శ్రేణులు పనిచేయాలని కోరారు.
స్థానికంగా వైసీపీ నాయకులు లేకపోతే, అధికార పార్టీకి చెందిన వారికి మాత్రమే ప్రభుత్వ పథకాలు అందే ప్రమాదం ఉందని వంశీ హెచ్చరించారు. రాష్ట్రవ్యాప్తంగా స్థానిక ఎన్నికలకు సిద్ధం కావాలని పార్టీ అధినేత జగన్ ఇటీవల ఇచ్చిన పిలుపు మేరకు ఈ సమావేశం జరిగింది. స్థానిక ఎన్నికల్లో గెలుపు ద్వారానే భవిష్యత్తులో జగన్ను మళ్లీ ముఖ్యమంత్రిని చేసే అవకాశం ఉంటుందని ఆయన పేర్కొన్నారు.
ప్రస్తుత కూటమి ప్రభుత్వంపై వంశీ తీవ్ర విమర్శలు చేశారు. సాగునీరు, తాగునీరు వంటి కనీస అవసరాలు తీర్చడంలో ప్రభుత్వం విఫలమైందని, కానీ గ్రామగ్రామాన నాణ్యమైన మద్యం మాత్రం అందుబాటులో ఉంచుతోందని ఆయన ఆరోపించారు. బడుగు, బలహీన వర్గాల అభివృద్ధికి జగన్ ప్రభుత్వం మళ్లీ అధికారంలోకి రావాల్సిన అవసరం ఉందని ఆయన అభిప్రాయపడ్డారు.
గత ఎన్నికల హామీల అమలుపై కూడా వంశీ ప్రస్తావించారు. 2014లో టీడీపీ ప్రభుత్వం రైతు, డ్వాక్రా రుణమాఫీ హామీలను ఇచ్చి, చివరకు వాటిని అటకెక్కించిందని ఆయన విమర్శించారు. 2024 ఎన్నికల సమయంలో కూడా చంద్రబాబు అమలు చేయని హామీలతోనే అధికారంలోకి వచ్చారని, ప్రస్తుతం పెన్షన్లు, రేషన్ కార్డులు, ఇళ్ల స్థలాలు ప్రజలకు అందడం లేదని ఆయన ఆరోపించారు.
ప్రభుత్వం ఆర్టీసీ బస్సులను కొనలేకపోతోందని, మెడికల్ కాలేజీ నిర్మాణం కూడా చేపట్టలేదని వంశీ పేర్కొన్నారు. ఈ ప్రభుత్వ వైఫల్యాలను ప్రజల్లోకి తీసుకెళ్లాలని ఆయన పార్టీ శ్రేణులకు దిశానిర్దేశం చేశారు. ఏపీలో ఎన్నికల సంఘం స్థానిక ఎన్నికల నిర్వహణకు ఏర్పాట్లు చేస్తుండగా, అన్ని రాజకీయ పార్టీలు ఈ ఎన్నికల్లో గెలుపు కోసం ప్రయత్నాలు ముమ్మరం చేస్తున్నాయి.
