అమరావతి ఔటర్ రింగ్ రోడ్డు (ORR) ప్రాజెక్టులో భాగంగా కృష్ణానదిపై రెండు చోట్ల మూడు లైన్ల చొప్పున బ్రిడ్జిలను నిర్మించాలని నేషనల్ హైవే అథారిటీ ఆఫ్ ఇండియా (NHAI) నిర్ణయించింది. ఈ ప్రాజెక్టులో ఐకానిక్ వంతెనలు ఉండాలని ముఖ్యమంత్రి చంద్రబాబు గత కొంతకాలంగా కోరుతున్నారు. ఆయన సూచనల మేరకు గతంలో రూపొందించిన ప్లాన్‌లో మార్పులు చేస్తూ ఎన్‌హెచ్ఏఐ అడుగులు వేస్తోంది.
2018లో కేంద్రం ఈ ప్రాజెక్టుకు ఆమోదం తెలిపినప్పుడు ఐకానిక్ వంతెనల ప్రతిపాదనలు ఉన్నాయి. అయితే 2024 డిసెంబర్‌లో ఆ ప్రతిపాదనలను పక్కన పెట్టి, కేవలం సాధారణ బ్రిడ్జిలను మాత్రమే నిర్మించాలని నిర్ణయించారు. అప్పట్లో రూ.38,450 కోట్ల వ్యయంతో డీపీఆర్ (ప్రాజెక్టు అమలుకు అవసరమైన సమగ్ర నివేదిక) కూడా సిద్ధం చేశారు.
ప్రస్తుతం చంద్రబాబు కోరిక మేరకు ఐకానిక్ బ్రిడ్జిలను చేర్చడంతో ప్రాజెక్టు వ్యయం రూ.30,491 కోట్లకు తగ్గింది. ఈ మార్పులతో పాటు మరికొన్ని ప్రతిపాదనలను కూడా ఎన్‌హెచ్ఏఐ సవరించింది. ఓఆర్ఆర్ బయటి వైపు సర్వీస్ రోడ్లు నిర్మించాలనే పాత ప్రతిపాదనను ఇప్పుడు పూర్తిగా తొలగించారు.
అంతేకాదు, గుంటూరు జిల్లా తెనాలి వద్ద చెన్నై-కోల్‌కతా నేషనల్ హైవేలో కాజ వరకు 17.5 కిలోమీటర్ల మేర 6 లైన్ల కనెక్ట్ రోడ్డు నిర్మాణ ప్రతిపాదనను కూడా రద్దు చేశారు. గతంలో మూడు చోట్ల సొరంగాలను 8 వరుసల రోడ్డుకు అనుకూలంగా తవ్వాలని అనుకోగా, ఇప్పుడు వాటిని 6 వరుసల సొరంగాలకు పరిమితం చేశారు. ఈ మార్పులతో ప్రాజెక్టు పనులు ముందుకు సాగనున్నాయి.
