శ్రీకాకుళం జిల్లాలో వైసీపీ కేడర్ బలంగా ఉన్నప్పటికీ, నాయకుల మధ్య ఉన్న విభేదాలు పార్టీని బలహీనపరుస్తున్నాయని క్షేత్రస్థాయిలో చర్చ జరుగుతోంది. తమ వ్యక్తిగత ఇగోల కోసం నాయకులు పార్టీ ప్రయోజనాలను పణంగా పెడుతున్నారని, దీనివల్ల క్లిష్ట పరిస్థితుల్లో పార్టీని నడిపించడం కష్టమవుతోందని ద్వితీయ శ్రేణి నేతలు ఆవేదన వ్యక్తం చేస్తున్నారు.
ప్రధానంగా ఇచ్చాపురం, టెక్కలి, ఆమదాలవలస, రాజాం నియోజకవర్గాల్లో గ్రూపుల గోల ఎక్కువగా ఉందని పార్టీ వర్గాలు చెబుతున్నాయి. ఇచ్చాపురంలో విజయసాయిరాజ్, నర్తు రామారావు, శ్యాంప్రసాద్ రెడ్డి వర్గాల మధ్య ఆధిపత్య పోరు నడుస్తుండగా, పలాసలో మాజీ మంత్రి సీదిరి అప్పలరాజు, మున్సిపల్ చైర్మన్ గిరిబాబు అంటీముట్టనట్లు వ్యవహరిస్తున్నారు.
టెక్కలిలో పేరాడకు స్థానిక నేతల నుంచి సహాయ నిరాకరణ ఎదురవుతోంది, ఇక్కడ చాలా మంది ఎమ్మెల్సీ దువ్వాడ శ్రీనివాస్తో టచ్లో ఉన్నారని సమాచారం. ఆమదాలవలసలో చింతాడ వర్సెస్ తమ్మినేని వర్గాల మధ్య, పాతపట్నంలో మాజీ ఎమ్మెల్యే రెడ్డి శాంతికి, మామిడి శ్రీకాంత్ వర్గానికి మధ్య ఆధిపత్య పోరు కొనసాగుతోంది. ఎచ్చెర్లలో గొర్లె కిరణ్ కుమార్, సాయికుమార్ మధ్య, రాజాంలో కంబాల జోగులు, తలే రాజేష్ వర్గాల మధ్య కూడా ఇదే పరిస్థితి కనిపిస్తోంది.
స్థానిక ఎన్నికల్లో సత్తా చాటాలని ధర్మాన బ్రదర్స్ ఇటీవల ఇన్ఛార్జ్లకు దిశానిర్దేశం చేసినప్పటికీ, క్షేత్రస్థాయిలో పరిస్థితులు అందుకు భిన్నంగా ఉన్నాయి. అధికార పార్టీగా ఉన్న తెలుగుదేశం పార్టీ (TDP) జిల్లాలో బలంగా ఉండటంతో, వైసీపీ నేతలు ఇలాగే వ్యవహరిస్తే ఎన్నికల్లో ఓటమి తప్పదని కార్యకర్తలు హెచ్చరిస్తున్నారు.
పార్టీకి నష్టం చేసే వారిపై చర్యలు తీసుకోవాలని, టాప్ టు బాటమ్ ప్రక్షాళన జరగాలని కార్యకర్తలు కోరుకుంటున్నారు. ఇప్పటికైనా నాయకులు తమ విభేదాలను పక్కన పెట్టి ఐక్యంగా ముందుకు సాగకపోతే, స్థానిక ఎన్నికల్లో భారీ మూల్యం చెల్లించుకోవాల్సి వస్తుందని పార్టీ వర్గాలు భావిస్తున్నాయి.
