బంకురా జిల్లా కరిసుంద గ్రామంలో జరిగిన దాడిలో అబ్దుల్ హఫీజ్ తండ్రి ప్రాణాలు కోల్పోయారు. ప్రభుత్వ పాఠశాలల్లోని అధ్వాన పరిస్థితులను ‘స్కూల్ ఠీక్ కరో’ అనే కార్యక్రమం ద్వారా వీడియో తీసి అధికారులకు పంపిస్తున్నందుకే హఫీజ్పై, ఆయన కుటుంబంపై ఈ దాడి జరిగిందని సీజేపీ ఆరోపించింది. దాడికి ముందు విద్యుత్ సరఫరా నిలిపివేయడం, ఆసుపత్రిలో చికిత్స పొందుతున్నప్పుడు కూడా దాడి చేయడం వంటివి రాజకీయ ప్రేరేపితమని పార్టీ పేర్కొంది.
ఈ కేసులో ఇప్పటివరకు ఎనిమిది మందిని పోలీసులు అరెస్ట్ చేశారు. నిందితుల్లో స్థానిక బీజేపీ నాయకుడు కూడా ఉన్నట్లు సమాచారం. తమ పార్టీకి చెందిన వారు ఎవరైనా ఈ ఘటనలో ఉంటే కఠిన చర్యలు తీసుకోవాలని బీజేపీ కూడా స్పష్టం చేసింది. అయితే, పోలీసులు ముందస్తు సమాచారం ఉన్నప్పటికీ తగిన రక్షణ కల్పించలేదని సీజేపీ నాయకులు విమర్శించారు.
హఫీజ్ కుటుంబం ఆర్థిక పరిహారం కోరడం లేదని, తన తండ్రి జ్ఞాపకార్థం గ్రామంలో ప్రభుత్వ పాఠశాలను ఏర్పాటు చేయాలని కోరుతున్నారని సీజేపీ సహ కన్వీనర్ ఆశుతోష్ రంకా తెలిపారు. బాధితులకు 24 గంటల భద్రత కల్పించాలని, కోర్టు పర్యవేక్షణలో విచారణ జరపాలని వారు డిమాండ్ చేశారు.
ఈ డిమాండ్లను అమలు చేయడానికి సీజేపీ ప్రభుత్వం పది రోజుల గడువు ఇచ్చింది. గడువులోపు స్పష్టమైన చర్యలు తీసుకోకపోతే, జిల్లా మేజిస్ట్రేట్ కార్యాలయం ఎదుట శాంతియుత నిరసన చేపడతామని పార్టీ హెచ్చరించింది.
