సాలూరులోని జడ్పీ ఉన్నత పాఠశాలలో మధ్యాహ్న భోజనం తర్వాత అరుణ్ తేజ, యాకూబ్ పాఠశాల ప్రహరీ గోడపై కూర్చుని మాట్లాడుతుండగా గోడ ఒక్కసారిగా కుప్పకూలింది. ఈ ప్రమాదంలో అరుణ్ తేజ అక్కడికక్కడే మృతి చెందగా, యాకూబ్ తీవ్ర గాయాలపాలయ్యాడు.
తన కుమారుడు మరణించినా పాఠశాల యాజమాన్యం సమాచారం ఇవ్వలేదని అరుణ్ తేజ తల్లిదండ్రులు ఆరోపించారు. మృతుడి కుటుంబానికి 50 లక్షల రూపాయల నష్టపరిహారం, కుటుంబంలో ఒకరికి ప్రభుత్వ ఉద్యోగం ఇవ్వాలని డిమాండ్ చేస్తూ బంధువులు, స్థానికులు పాఠశాల వద్ద ఆందోళనకు దిగారు.
ఈ ఘటనపై మంత్రి నారా లోకేష్ దిగ్భ్రాంతి వ్యక్తం చేస్తూ, మంత్రి సంధ్యారాణిని వివరాలు అడిగి తెలుసుకున్నారు. గాయపడ్డ విద్యార్థికి మెరుగైన వైద్యం అందించాలని అధికారులను ఆదేశించిన మంత్రి, మృతుడి కుటుంబానికి ప్రభుత్వం తరఫున 5 లక్షల రూపాయల ఎక్స్గ్రేషియా (ప్రభుత్వం ఇచ్చే పరిహారం) ప్రకటించారు.
బాధిత కుటుంబాన్ని ప్రభుత్వం ఆదుకుంటుందని మంత్రి లోకేష్ భరోసా ఇచ్చారు. ఆందోళనకారులు మృతదేహాన్ని పాఠశాల వద్ద ఉంచి నిరసన తెలుపుతుండగా, గాయపడ్డ విద్యార్థికి ఆసుపత్రిలో చికిత్స కొనసాగుతోంది.
