సినిమా చూస్తున్నప్పుడు లేదా ఇంట్లో ఖాళీగా ఉన్నప్పుడు చాలామంది పాప్కార్న్ తింటుంటారు. దీన్ని కేవలం కాలక్షేపం కోసం తినే స్నాక్గా చూడకుండా, సరైన పద్ధతిలో తయారు చేసుకుంటే శరీరానికి ఎన్నో పోషకాలు అందుతాయని పోషకాహార నిపుణులు స్పష్టం చేస్తున్నారు.
మొక్కజొన్న గింజలతో తయారయ్యే పాప్కార్న్లో ఫైబర్, ప్రొటీన్, మెగ్నీషియం, ఫాస్ఫరస్ వంటి పోషకాలు ఉంటాయి. వీటితో పాటు శరీర కణాలను ఆక్సీకరణ ఒత్తిడి (Stress) మరియు ఫ్రీ రాడికల్స్ అనే హానికర కణాల నుంచి కాపాడే ఫెరూలిక్ యాసిడ్ వంటి యాంటీఆక్సిడెంట్లు ఇందులో పుష్కలంగా లభిస్తాయి.
ప్రముఖ వైద్య పరిశోధనా సంస్థ ‘క్లీవ్ల్యాండ్ క్లినిక్’ నివేదిక ప్రకారం, పాప్కార్న్లోని పీచు పదార్థం జీర్ణక్రియను మెరుగుపరుస్తుంది. ఇది ప్రేగుల కదలికలను క్రమబద్ధీకరించి, జీర్ణవ్యవస్థ పనితీరును చురుగ్గా ఉంచడంలో సహాయపడుతుంది.
బరువు తగ్గాలనుకునే వారికి కూడా ఇది మేలు చేస్తుంది. ఇందులోని పీచు పదార్థం నెమ్మదిగా జీర్ణమవ్వడం వల్ల కడుపు నిండిన భావన కలుగుతుంది, దీనివల్ల అనవసరమైన చిరుతిళ్లు తినకుండా ఆకలిని కట్టడి చేయవచ్చు.
పాప్కార్న్ ఒక సంపూర్ణ ధాన్యం కావడం వల్ల, ఇది రక్తంలో చక్కెర స్థాయిలు ఒక్కసారిగా పెరగకుండా స్థిరంగా ఉంచుతుంది. అంతేకాదు, ఇందులోని ఫైబర్ శరీరంలోని చెడు కొలెస్ట్రాల్ను బయటకు పంపి గుండె ఆరోగ్యాన్ని మెరుగుపరచడానికి తోడ్పడుతుంది.
అయితే, పాప్కార్న్ తయారు చేసే విధానంపైనే దాని ఆరోగ్య ప్రయోజనాలు ఆధారపడి ఉంటాయి. థియేటర్లు లేదా మార్కెట్లలో దొరికే ప్యాకెట్లలో అధిక మోతాదులో వెన్న, ఉప్పు, చక్కెర మరియు కృత్రిమ ఫ్లేవర్లు కలుపుతారు. ఇవి శరీరంలో కేలరీలు, కొవ్వులను పెంచి గుండెకు ప్రమాదకరంగా మారతాయి.
ఇంట్లోనే స్వచ్ఛమైన గింజలతో తక్కువ నూనెతో లేదా వేడి గాలితో (Air-popped) తయారు చేసుకున్న పాప్కార్న్ ఆరోగ్యానికి ఉత్తమం. రుచి కోసం ఉప్పు, వెన్నకు బదులుగా మిరియాల పొడి, దాల్చినచెక్క పొడి లేదా సహజమైన హెర్బ్స్ వాడుకోవడం మంచిదని నిపుణులు సూచిస్తున్నారు.
