ఆగస్టు 7న ప్రేక్షకుల ముందుకు వచ్చిన 'కొరియన్ కనకరాజు' చిత్రం బాక్సాఫీస్ వద్ద మంచి విజయాన్ని అందుకుంది. ఈ సినిమా ఇప్పటికే 30 కోట్లకు పైగా గ్రాస్ వసూలు చేసి సక్సెస్ఫుల్గా ప్రదర్శితమవుతోంది. ఈ విజయాన్ని పురస్కరించుకుని చిత్ర బృందం నిర్వహించిన మెగా బ్లాక్ బస్టర్ సెలబ్రేషన్స్కు మెగాస్టార్ చిరంజీవి ముఖ్య అతిథిగా హాజరయ్యారు.
ఈ వేదికపై వరుణ్ తేజ్ మాట్లాడుతూ తన కెరీర్, కుటుంబంపై ఉన్న గౌరవాన్ని వ్యక్తం చేశారు. తనకు సినిమా తప్ప వేరే ఏమీ తెలియదని, చిరంజీవి సూచనలను పాటిస్తూ ముందుకు సాగుతున్నానని చెప్పారు. తన పెదనాన్న పేరును ఎక్కడా చెడగొట్టకూడదని, తన తల్లిదండ్రులను గర్వపడేలా చేయడమే తన లక్ష్యమని ఆయన పేర్కొన్నారు. అలాగే కళ్యాణ్ బాబాయ్, చరణ్ అన్న కళ్లలో సంతోషాన్ని చూడాలని ఆశిస్తున్నట్లు తెలిపారు.
చిన్నప్పటి జ్ఞాపకాలను గుర్తు చేసుకున్న వరుణ్ తేజ్, ఆగస్టు 22 తనకు ఎప్పుడూ నేషనల్ హాలిడే లాంటిదని చెప్పారు. చిన్నప్పుడు ఆ రోజు స్కూల్కు వెళ్లనని నాన్నతో చెబితే, ఆయన వెంటనే పెదనాన్న ఇంటికి పంపించేవారని గుర్తు చేసుకున్నారు. ఈసారి తన పెదనాన్న పుట్టినరోజును 'కొరియన్ కనకరాజు' సక్సెస్తో జరుపుకోవడం సంతోషంగా ఉందని ఆయన ముగించారు.
