కాకినాడ పంచాయతీ రాజ్ ఏఈ నూకరాజు, ఆయన భార్య మీనా, కుమార్తె సౌజన్య, మనవడు కార్తికేయ గత ఆదివారం గోదావరి నదిలో దూకారు. ఈ ఘటనలో నూకరాజు, సౌజన్య మృతదేహాలు లభ్యం కాగా, మీనా మృతదేహం కోసం గాలింపు చర్యలు కొనసాగుతున్నాయి. ప్రాణాలతో బయటపడిన మనవడు కార్తికేయ పోలీసులకు కీలక వివరాలు అందించాడు.
నూకరాజు తన కుటుంబంతో కలిసి నదిలోకి దూకడానికి ముందే ఒక లేఖతో పాటు వీలునామా రాసిపెట్టారు. అందులో తన స్థిర, చరాస్తులను తన సోదరితో పాటు మరో ఇద్దరికి రాసిచ్చినట్లు పోలీసులు గుర్తించారు. అయితే, మనవడు కార్తికేయ కూడా తమతో పాటు చనిపోతాడని భావించి, అతని పేరును వీలునామాలో చేర్చలేదు.
రైఫిల్ షూటింగ్ కోచ్ షేక్ సాధిక్ ఖాన్ వేధింపుల వల్లే తాము ఈ నిర్ణయం తీసుకున్నట్లు నూకరాజు మరణ వాంగ్మూలంలో పేర్కొన్నారు. రెండు నెలల క్రితం నూకరాజు స్వయంగా సాధిక్ ఇంటికి వెళ్లి వేధింపులు ఆపాలని వేడుకున్నా ఫలితం లేకపోయింది. సాధిక్ సొంత తల్లి చెప్పిన మాటలను కూడా అతను పట్టించుకోలేదని పోలీసుల విచారణలో తేలింది.
నదిలో దూకే ముందు తన తల్లి చెప్పిన మాటలను కార్తికేయ పోలీసులకు వివరించాడు. ఈత వచ్చిన కార్తికేయ బతికి బయటపడితే, ఒక నిర్దిష్ట వ్యక్తి వద్దకు వెళ్లాలని ఆమె సూచించారు. ఆ వ్యక్తి ఎవరు, ఈ కేసుతో వారికి ఉన్న సంబంధం ఏమిటనే కోణంలో పోలీసులు దర్యాప్తు చేస్తున్నారు.
ప్రస్తుతం పరారీలో ఉన్న నిందితుడు సాధిక్ ఖాన్ కోసం పోలీసులు గాలింపు ముమ్మరం చేశారు. సాధిక్ కుటుంబ సభ్యులను అదుపులోకి తీసుకుని విచారిస్తున్నారు. సాధిక్ స్నేహితులతో పాటు, ఆ వ్యక్తి ఫోన్లు మూడు రోజులుగా స్విచ్ ఆఫ్ లో ఉండటంతో, వారు అందుబాటులోకి వస్తే మరిన్ని విషయాలు వెలుగులోకి వస్తాయని పోలీసులు భావిస్తున్నారు.
