మహారాష్ట్రలోని ధారాశివ్ జిల్లాలో ఖిల్లా నల్దుర్గ్ ప్రాంతంలో ఈ విషాద ఘటన జరిగింది. జాతీయ స్థాయిలో ఐదు స్వర్ణ, ఆరు రజత పతకాలు సాధించిన 30 ఏళ్ల రెజ్లర్ అశ్విని మనోహర్ పాల్, తన ముగ్గురు పిల్లలతో కలిసి 100 అడుగుల లోయలోకి దూకారు.
ఈ ఘటనలో అశ్వినితో పాటు ఆమె ఐదున్నరేళ్ల కుమారుడు అజింక్యా, రెండున్నరేళ్ల కవల కుమార్తెల్లో ఒకరైన క్రాంతి అక్కడికక్కడే మరణించారు. తీవ్ర గాయాలపాలైన మరో కుమార్తె వీరాను స్థానికులు ఆస్పత్రికి తరలించగా, అక్కడ ఆమె చికిత్స పొందుతోంది.
కవల పిల్లలు పుట్టినప్పటి నుంచి అశ్విని అత్తింటివారు డబ్బు, బంగారం కోసం వేధించారని ఆమె తండ్రి ఆరోపించారు. ఈ వేధింపులు భరించలేక మూడు నెలల క్రితమే అశ్విని పుట్టింటికి వచ్చినా, ఫోన్ ద్వారా వేధింపులు ఆగలేదని ఆయన తెలిపారు.
మృతురాలి తండ్రి ఇచ్చిన ఫిర్యాదు మేరకు అశ్విని భర్త, మామ, అత్త మరియు భర్త తరఫు బంధువుపై పోలీసులు కేసు నమోదు చేశారు. వరకట్న వేధింపులు మరియు ఆత్మహత్యకు ప్రేరేపించినట్లుగా వీరిపై అభియోగాలు మోపారు.
ప్రస్తుతం పోలీసులు ఈ ఘటనపై అన్ని కోణాల్లో దర్యాప్తు చేస్తున్నారు. నిందితులపై చట్టపరమైన చర్యలు తీసుకునేందుకు ఆధారాలను సేకరిస్తున్నారు.
