గ్రీస్ ప్రభుత్వం ఇజ్రాయెల్తో సుమారు 3 బిలియన్ యూరోల (దాదాపు 3.5 బిలియన్ డాలర్లు) విలువైన రక్షణ ఒప్పందంపై సంతకం చేసింది. ఇందులో భాగంగా స్వల్ప, మధ్య, దీర్ఘ శ్రేణి క్షిపణులు, రాడార్ వ్యవస్థలను గ్రీస్ కొనుగోలు చేయనుంది. ఈ ఒప్పందానికి గ్రీస్ భద్రతా మండలి ఇప్పటికే ప్రాథమిక ఆమోదం తెలిపింది.
గ్రీస్ అధికారులు టెల్ అవీవ్లో ఇజ్రాయెల్ రక్షణ సంస్థలైన సిబాట్, మాఫాట్ డైరెక్టరేట్లతో నాలుగు వేర్వేరు ఒప్పందాలపై సంతకాలు చేయనున్నారు. ఈ బహుళ అంచెల వాయు రక్షణ వ్యవస్థను సైనిక ఆధునీకరణలో భాగంగా గ్రీస్ చేపడుతోంది. ఇజ్రాయెల్తో కలిసి గ్రీస్ ఇప్పటికే వాయు శిక్షణా కేంద్రాలను నిర్వహిస్తోంది, అలాగే ఏటా సంయుక్త సైనిక విన్యాసాలు కూడా చేస్తోంది.
టర్కీతో దశాబ్దాలుగా కొనసాగుతున్న సరిహద్దు వివాదాలే ఈ భారీ ఆయుధ కొనుగోలుకు ప్రధాన కారణమని తెలుస్తోంది. ఏజియన్ సముద్రంలోని ద్వీపాలు, గగనతలం, సైప్రస్ ద్వీపం విషయంలో రెండు దేశాల మధ్య చారిత్రక ఘర్షణలు ఉన్నాయి. నాటో (అమెరికా, ఐరోపా దేశాల సైనిక కూటమి)లో సభ్య దేశాలైనప్పటికీ, ఈ రెండు దేశాల మధ్య ఉద్రిక్తతలు తగ్గడం లేదు.
గ్రీస్ తన రక్షణ కోసం జీడీపీలో సుమారు 3.5 శాతాన్ని ఖర్చు చేస్తోంది, ఇది ఇతర నాటో మిత్రదేశాల కంటే ఎక్కువ. 2036 నాటికి ‘అకిల్స్ షీల్డ్’ పేరుతో బహుళ-పొరల యాంటీ-బాలిస్టిక్, యాంటీ-ఎయిర్క్రాఫ్ట్, యాంటీ-డ్రోన్ వ్యవస్థను నిర్మించాలని గ్రీస్ లక్ష్యంగా పెట్టుకుంది. దీనికోసం అమెరికా నుంచి ఎఫ్-35 ఫైటర్ జెట్లు, ఫ్రాన్స్, ఇటలీల నుంచి యుద్ధ నౌకలను కొనుగోలు చేసేందుకు 28 బిలియన్ యూరోల ప్రణాళికను సిద్ధం చేసింది.
మరోవైపు, టర్కీ కూడా తన రక్షణ వ్యవస్థను మెరుగుపరుచుకునేందుకు బిలియన్ల యూరోలు ఖర్చు చేస్తోంది. ఇటీవల పాకిస్థాన్తో కూడా టర్కీ కీలక ఒప్పందం చేసుకుంది. ఇజ్రాయెల్, టర్కీల మధ్య మాటల యుద్ధం నడుస్తున్న నేపథ్యంలో, గ్రీస్లో భారీగా ఆయుధాలను నిల్వ ఉంచడం ద్వారా ఇజ్రాయెల్ తన వ్యూహాన్ని అమలు చేస్తోందని వార్తలు వస్తున్నాయి.
