నీటి ప్రశ్నాపత్రం లీకేజీ వ్యవహారంపై 26 రోజుల పాటు నిరాహార దీక్ష చేసిన సోనమ్ వాంగ్చుక్, ఇటీవల తన దీక్షను విరమించారు. ఆరోగ్యం క్షీణించడంతో ఆస్పత్రిలో చేరిన ఆయన, అక్కడే దీక్షను కొనసాగించారు. అయితే, కేంద్ర మంత్రి ధర్మేంద్ర ప్రధాన్ రాజీనామా చేయకుండానే దీక్ష విరమించడంపై సోషల్ మీడియాలో విమర్శలు వెల్లువెత్తాయి. కేంద్రంతో ఏదో డీల్ కుదుర్చుకున్నారని నెటిజన్లు ఆరోపించారు.
ఈ విమర్శలపై వాంగ్చుక్ తాజాగా ఒక వీడియో ద్వారా ఘాటుగా స్పందించారు. 26 రోజుల పాటు ఆకలితో ఉన్న వ్యక్తికి తన దీక్ష స్వచ్ఛతను నిరూపించుకోవడానికి ఎవరి సర్టిఫికెట్ అవసరమని ఆయన ప్రశ్నించారు. ఏసీ గదుల్లో కూర్చుని డీల్ చేసుకోవడం సులభమని, అలాంటి పనులు చేయాల్సి వస్తే తాను 26 రోజులు ఆకలితో ఉండాల్సిన అవసరం లేదని ఆయన పేర్కొన్నారు.
ధర్మేంద్ర ప్రధాన్ రాజీనామా ముఖ్యమైన అంశమేనని వాంగ్చుక్ అంగీకరించారు. అయితే, నిరసనకారులపై ఎలాంటి చట్టపరమైన చర్యలు తీసుకోకుండా నిరోధించడమే తనకు అత్యంత ప్రాధాన్య అంశంగా అనిపించిందని ఆయన వివరించారు. అందుకే కేంద్ర మంత్రులు జేపీ నడ్డా తదితరులతో చర్చలు జరిపే సమయంలో, మంత్రి రాజీనామా గురించి తాను పట్టుబట్టలేదని స్పష్టం చేశారు.
ప్రజలు ఆగ్రహంతో ఉన్నారని, ఈ విషయంలో కేంద్రం ఎక్కువ కాలం నాన్చలేదని వాంగ్చుక్ అభిప్రాయపడ్డారు. త్వరలోనే మంత్రి రాజీనామా సమర్పిస్తారని తనకు తెలుసని, అందుకే ఆ అంశంపై తాను మరీ ఎక్కువ ఒత్తిడి చేయలేదని ఆయన తన వివరణలో పేర్కొన్నారు.
