రాష్ట్రంలో నకిలీ కార్డులను అడ్డుకోవడానికి, లబ్ధిదారుల వివరాలను డిజిటల్గా ధ్రువీకరించడానికి సివిల్ సప్లయ్స్ శాఖ ఈ కొత్త కార్డులను తీసుకువస్తోంది. కార్డు ముందు భాగంలో ముఖ్యమంత్రి రేవంత్ రెడ్డి, మంత్రి ఉత్తమ్ కుమార్ రెడ్డి ఫొటోలతో పాటు యజమాని వివరాలు, రేషన్ దుకాణం నంబరు ఉంటాయి. కార్డు అసలుదనాన్ని గుర్తించేందుకు వీలుగా ఇందులో స్పర్శ ద్వారా, కంటితో చూసేందుకు వీలైన వివిధ భద్రతా ఫీచర్లను పొందుపరిచారు.
ఈ కార్డులో తెలంగాణ ప్రభుత్వ చిహ్నంతో కూడిన హోలోగ్రామ్, వాటర్మార్క్, మరియు అల్ట్రా వయొలెట్ (UV) లోగో వంటివి ఉంటాయి. యూవీ కిరణాల ద్వారా మాత్రమే కనిపించే ఈ లోగో కార్డు నిజమైనదా కాదా అని త్వరగా నిర్ధారించడానికి ఉపయోగపడుతుంది. అలాగే, నిర్దిష్ట కోణంలో చూస్తేనే కనిపించే డ్యూయల్ హిడెన్ ఇమేజెస్, భూతద్దం ద్వారా మాత్రమే కనిపించే మైక్రో టెక్స్ట్ వంటివి కార్డును డూప్లికేట్ చేయడం కష్టతరం చేస్తాయి.
కార్డు వెనుక భాగంలో 20x20 మిల్లీమీటర్ల పరిమాణంలో ఎన్క్రిప్టెడ్ క్యూఆర్ కోడ్ (డిజిటల్ సమాచారాన్ని దాచిన చదరపు ఆకృతి గుర్తు) ఉంటుంది. దీనిని ప్రత్యేక సాఫ్ట్వేర్ ద్వారా స్కాన్ చేసి లబ్ధిదారుల వివరాలను ధ్రువీకరించవచ్చు. కార్డుపై అక్షరాలను ఎంబోస్ (స్పర్శకు తగిలేలా ఉబ్బెత్తుగా ముద్రించడం) చేయడం, గిల్లోష్ ప్యాటర్న్ అనే సంక్లిష్టమైన రేఖా ఆకృతులను వాడటం ద్వారా భద్రతను మరింత పెంచారు.
ఈ కొత్త విధానం ద్వారా కార్డుల తయారీలో నకిలీలను అడ్డుకోవడంతో పాటు, డేటాలో అనధికార మార్పులను నివారించాలని ప్రభుత్వం లక్ష్యంగా పెట్టుకుంది. సాధారణ ప్రింటింగ్ యంత్రాలతో వీటిని కాపీ చేయడం సాధ్యం కాదని అధికారులు చెబుతున్నారు.
