యాపిల్ కంపెనీ సీఈఓగా 15 ఏళ్ల ప్రస్థానాన్ని టిమ్ కుక్ ముగించారు. 2011లో కంపెనీ సహ వ్యవస్థాపకుడు స్టీవ్ జాబ్స్ మరణానికి కొన్ని వారాల ముందు ఆయన ఈ బాధ్యతలను స్వీకరించారు. తన చివరి రోజున ఉద్యోగులకు రాసిన మెమోలో, తన విజయం వెనుక సిబ్బంది కృషి ఉందని ఆయన పేర్కొన్నారు.
టిమ్ కుక్ నాయకత్వంలో యాపిల్ ప్రపంచంలోనే అత్యంత విలువైన కంపెనీలలో ఒకటిగా ఎదిగింది. 2011లో 350 బిలియన్ డాలర్లుగా ఉన్న కంపెనీ మార్కెట్ విలువ, 2026 ఆగస్టు 31 నాటికి 4.5 ట్రిలియన్ డాలర్లను దాటింది. ఈ కాలంలో ఆపిల్ వాచ్, ఎయిర్పాడ్స్ వంటి కొత్త ఉత్పత్తులను విడుదల చేయడంతో పాటు ఐఫోన్, ఐప్యాడ్, మ్యాక్ శ్రేణులను ఆయన విస్తరించారు.
పదవి నుంచి తప్పుకున్నా, టిమ్ కుక్ కంపెనీలో ఎగ్జిక్యూటివ్ చైర్మన్గా కొనసాగుతూ పర్యవేక్షణ బాధ్యతలు చూస్తారు. 30 ఏళ్లుగా కంపెనీతో ప్రయాణం చేస్తున్న ఆయన, స్టీవ్ జాబ్స్ ఆశించిన మార్గంలోనే సంస్థ ముందుకు సాగుతుందని విశ్వాసం వ్యక్తం చేశారు. ఎక్స్ (ట్విట్టర్) వేదికగా ఆపిల్ కమ్యూనిటీకి ఆయన కృతజ్ఞతలు తెలిపారు.
కొత్త సీఈఓగా బాధ్యతలు చేపట్టనున్న 51 ఏళ్ల జాన్ టెర్నస్, 2001లో యాపిల్ డిజైన్ బృందంలో చేరారు. గతంలో హార్డ్వేర్ ఇంజనీరింగ్ సీనియర్ వైస్ ప్రెసిడెంట్గా పనిచేసిన ఆయన, ఐఫోన్ ఎయిర్ అభివృద్ధిలో మరియు మ్యాక్ కంప్యూటర్ల కోసం సొంతంగా తయారు చేసుకున్న ఎం-సిరీస్ చిప్ల తయారీలో కీలక పాత్ర పోషించారు.
సెప్టెంబర్ 9న జరగనున్న యాపిల్ ఈవెంట్లో జాన్ టెర్నస్ తొలిసారిగా వేదికపైకి రానున్నారు. ఈ కార్యక్రమంలో ఆయన ఐఫోన్ 18 ప్రో సిరీస్తో పాటు, కంపెనీ మొట్టమొదటి ఫోల్డబుల్ (మడతపెట్టే వీలున్న) ఐఫోన్ను ఆవిష్కరించే అవకాశం ఉంది.
