శామీర్పేట మండలం బొంరాస్పేటలో సర్వే నంబర్లు 323 నుంచి 409 వరకు ఉన్న 1,049 ఎకరాల భూమిపై అనధికారిక నిషేధం కొనసాగుతోంది. ఈ భూములకు సంబంధించి ఎలాంటి లావాదేవీలు జరగకుండా అధికారులు అడ్డుకుంటున్నారని, కనీసం భూమిని వ్యవసాయేతర అవసరాలకు వాడుకునే 'నాలా' అనుమతులు కూడా ఇవ్వడం లేదని రైతులు ఆవేదన వ్యక్తం చేస్తున్నారు.
ప్రభుత్వ రికార్డుల్లో భూమి వివరాలను నమోదు చేసే 'భూ భారతి' పోర్టల్లో అసలు యజమానులకు తెలియకుండానే పేర్లు మారిపోతున్నాయి. ఇలా మారిన భూమిలో సగం భాగం వెంటనే ఇతరుల పేరు మీదకు వెళ్తుండటంతో, ఇందులో ఏదో పెద్ద దందా జరుగుతోందని బాధితులు అనుమానిస్తున్నారు. ఈ వ్యవహారంపై అధికారులను అడిగితే సరైన సమాధానం రావడం లేదని వారు చెబుతున్నారు.
ఈ భూములకు దశాబ్దాల చరిత్ర ఉంది. 1950-60 దశకంలో మాజీ ఎంపీ దుగ్గిరాల బలరామకృష్ణయ్య తన కుటుంబ సభ్యులు, సన్నిహితుల పేరు మీద వీటిని కొనుగోలు చేశారు. ఆ తర్వాత కాలంలో ఈ భూములు అనేక మంది చేతులు మారాయి, ప్రస్తుతం సుమారు 400 మందికి పైగా రైతులు వీటిని చట్టబద్ధంగా కొనుగోలు చేసి సాగు చేసుకుంటున్నారు.
ప్రభుత్వం తమ భూములను కాపాడటం లేదని, అక్రమంగా పేర్లు మారుస్తున్నారని విసిగిపోయిన బొంరాస్పేట రైతులు శుక్రవారం మహాధర్నాకు సిద్ధమవుతున్నారు. తమకు న్యాయం చేయాలని నెలల తరబడి తహసీల్దార్ కార్యాలయం నుంచి ప్రభుత్వ పెద్దల వరకు మొరపెట్టుకున్నా ఫలితం లేదని వారు వాపోతున్నారు.
