రాష్ట్ర ప్రభుత్వ ఉద్యోగులకు చెల్లించాల్సిన బకాయిలు రూ. 40 వేల కోట్లకు పైగా ఉన్నాయని ఏపీ జేఏసీ అమరావతి నేతలు తెలిపారు. ఎన్నికల సమయంలో కూటమి ప్రభుత్వం ఇచ్చిన హామీలను అమలు చేయాలని, పీఆర్సీ కమిషన్ (ప్రభుత్వ ఉద్యోగుల వేతన సవరణ కోసం ఏర్పాటు చేసే కమిషన్) నియామకం, ఐఆర్ (మధ్యంతర భృతి) ప్రకటన వంటి 29 డిమాండ్లను పరిష్కరించాలని వారు డిమాండ్ చేస్తున్నారు.
ఈ ఆందోళనల్లో భాగంగా ఆగస్టు 31న జిల్లా కలెక్టర్లకు పీజీఆర్ఎస్ (ప్రజా ఫిర్యాదుల పరిష్కార వ్యవస్థ) ద్వారా నోటీసులు ఇవ్వాలని ఉద్యోగ సంఘాలు నిర్ణయించాయి. సెప్టెంబర్ 1న ‘సీఎం సార్.. మా డబ్బులు మాకివ్వండి’ అనే నినాదంతో సెల్ఫోన్ డీపీలు పెట్టుకుని నిరసన తెలపనున్నారు. సెప్టెంబర్ 1 నుంచి 5 వరకు నల్ల బ్యాడ్జీలతో విధులకు హాజరు కావడం, సెప్టెంబర్ 3 నుంచి 5 వరకు భోజన విరామ సమయంలో నిరసనలు చేపట్టడం వంటివి తొలి దశలో భాగంగా ఉన్నాయి.
సెప్టెంబర్ 15 నుంచి రెండో దశ ఆందోళనలు ప్రారంభమవుతాయి. ఇందులో భాగంగా ప్రభుత్వ నిబంధనల ప్రకారం ‘వర్క్ టు రూల్’ (కేవలం విధి నిర్వహణకు సంబంధించిన పనులు మాత్రమే చేయడం) పాటించనున్నారు. సెప్టెంబర్ 23న కలెక్టరేట్లు, ఆర్డీఓ (రెవెన్యూ డివిజనల్ ఆఫీసర్) కార్యాలయాల వద్ద ధర్నాలు నిర్వహించి, సెప్టెంబర్ 26న ఉద్యోగుల కుటుంబ సభ్యులతో కలిసి నిరసన తెలుపనున్నారు.
ఈ ఉద్యమానికి ఏఐటీయూసీ, సీఐటీయూ వంటి కార్మిక సంఘాలతో పాటు విద్యుత్, ఆర్టీసీ ఉద్యోగ సంఘాలు కూడా మద్దతు ప్రకటించాయి. ఇది ప్రభుత్వానికి వ్యతిరేకంగా కాకుండా, తమ న్యాయమైన హక్కుల సాధన కోసమేనని ఉద్యోగ సంఘాల నేతలు స్పష్టం చేశారు.
ఒకవేళ ఈ రెండు దశల తర్వాత కూడా సమస్యలు పరిష్కారం కాకపోతే, మూడో దశలో రిలే నిరాహార దీక్షలు, సహాయ నిరాకరణ, ఛలో విజయవాడ వంటి కార్యక్రమాలు చేపట్టనున్నారు. చివరగా నిరవధిక సమ్మెకు వెళ్లేలా కూడా ఉద్యోగ సంఘాలు ప్రణాళిక సిద్ధం చేశాయి.
