స్థానిక సంస్థల ఎన్నికల్లో వెనుకబడిన తరగతులకు (బీసీ) 34 శాతం రిజర్వేషన్లు కల్పిస్తూ ఏపీ ప్రభుత్వం జారీ చేసిన జీవోలు (ప్రభుత్వ ఉత్తర్వులు) 1065, 105లపై ఏపీ హైకోర్టు విచారణ జరిపింది. రాజ్యాంగం ప్రకారం రిజర్వేషన్లు 50 శాతానికి మించకూడదనే నిబంధనను ఈ ఉత్తర్వులు ఉల్లంఘిస్తున్నాయని, వీటిని చట్టవిరుద్ధంగా ప్రకటించాలని కోరుతూ న్యాయవాది తాండవ యోగేష్ కోర్టులో పిటిషన్ దాఖలు చేశారు.
ఈ పిటిషన్ను చీఫ్ జస్టిస్ లిసా గిల్, జస్టిస్ చల్లా గుణరంజన్లతో కూడిన ధర్మాసనం విచారించింది. ఎస్సీ, ఎస్టీ, బీసీ రిజర్వేషన్లు కలిపి మొత్తం 50 శాతం దాటకుండా జీవోలను సవరించాలని పిటిషనర్ కోర్టును కోరారు. ఈ నేపథ్యంలో ప్రభుత్వం అనుసరించిన విధానాలపై ధర్మాసనం పలు ప్రశ్నలు లేవనెత్తింది.
రిటైర్డ్ ఐఏఎస్ అధికారి రాజీవ్ రంజన్ మిశ్రా నేతృత్వంలోని కమిషన్ నియామక ఉత్తర్వుల కాపీని కోర్టుకు సమర్పించాలని ప్రభుత్వాన్ని ఆదేశించింది. ఈ కమిషన్ ఏర్పాటు వెనుక ఉన్న ఉద్దేశం ఏమిటి, బీసీలకు 34 శాతం రిజర్వేషన్లు కల్పించాలని ఏ ప్రాతిపదికన, ఏ గణాంకాలతో సిఫార్సు చేసిందో వివరించాలని కోరింది. కమిషన్ నివేదికను తాము స్వయంగా పరిశీలిస్తామని ధర్మాసనం స్పష్టం చేసింది.
అంతేకాదు, గతంలో రాష్ట్ర ప్రణాళికా శాఖ నిర్వహించిన సమగ్ర కుటుంబ సర్వే వివరాలను కూడా కోర్టు ముందు ఉంచాలని ఆదేశించింది. ఈ సర్వేను ఏ ప్రయోజనం కోసం చేపట్టారో స్పష్టత ఇవ్వాలని ప్రభుత్వాన్ని కోరింది. ప్రభుత్వం సమర్పించే ఈ వివరాలన్నింటినీ పరిశీలించిన తర్వాతే తుది నిర్ణయం వెలువరిస్తామని పేర్కొంటూ, హైకోర్టు తీర్పును రిజర్వ్ చేసింది.
