కెసిఆర్ ఫామ్హౌస్లో 388 ఎకరాల ప్రభుత్వ భూమి ఉందని, 1950 నుంచి వివాదంలో ఉన్న ఈ భూమి 2017లో కెసిఆర్ వశమైందని సిఎం రేవంత్ రెడ్డి తెలిపారు. సర్వే నంబర్ 325లో ఉన్న ఈ భూమికి సంబంధించి రికార్డులు లేవని, ఇది ప్రభుత్వ భూమి అని ఆయన పేర్కొన్నారు. ఈ వ్యవహారంపై కెసిఆర్కు నోటీసులు ఇచ్చి, పూర్తి వివరాలను బయటపెట్టాలని అధికారులను సిఎం ఆదేశించారు.
ఈ విచారణను 30 రోజుల్లో పూర్తి చేయాలని, లేనిపక్షంలో అధికారులపై చర్యలు తీసుకుంటామని సిఎం హెచ్చరించారు. ఈ ప్రక్రియను పర్యవేక్షించాలని జిల్లా మంత్రి దామోదర రాజనర్సింహా, జిల్లా ఇన్చార్జీ మంత్రి వివేక్లకు ఆయన సూచించారు. విచారణలో జాప్యం జరిగితే మంత్రులపై కూడా చర్యలు తప్పవని ఆయన స్పష్టం చేశారు. విచారణ పూర్తయ్యాక, ఆ ప్రభుత్వ భూమిని దళితులకు పంచిపెట్టి వారిని యజమానులను చేస్తామని సిఎం ప్రకటించారు.
అసెంబ్లీలో 22ఏ (రిజిస్ట్రేషన్లకు వీలులేని భూముల జాబితా)పై జరిగిన చర్చలో భాగంగా బిఆర్ఎస్ హయాంలో జరిగిన భూ అక్రమాలపై సిఎం రేవంత్ రెడ్డి మాట్లాడారు. కెసిఆర్ కుటుంబ సభ్యుల పేర్ల మీద ఉన్న వేల కోట్ల రూపాయల విలువైన వందల ఎకరాల భూముల వివరాలను ఆయన బయటపెట్టారు. సిద్దిపేటలో కెసిఆర్, ఆయన సతీమణి శోభల పేరిట 67.5 ఎకరాలు, కెటిఆర్ కుటుంబ సభ్యుల పేరిట 123 ఎకరాలు ఉన్నాయని ఆయన వివరించారు.
సత్యం రామలింగరాజుకు చెందిన శతభిష ఆగ్రో ప్రైవేట్ లిమిటెడ్ కంపెనీ నుంచి కెటిఆర్ భూములు బదిలీ చేయించుకున్నారని సిఎం ఆరోపించారు. ప్రభుత్వం సీజ్ చేసిన (జప్తు చేసిన) సత్యం రామలింగరాజు భూములను కెటిఆర్ కుటుంబం కొట్టేసిందని ఆయన పేర్కొన్నారు. జన్వాడలో కెటిఆర్ ఉంటున్న ఫామ్హౌస్ కూడా రామలింగరాజు ఆస్తి అని ఆయన తెలిపారు.
హరీష్రావు, కవిత, జోగినపల్లి సంతోష్రావు కుటుంబాలకు ఉన్న భూములతో కలిపి, మొత్తం 9 జిల్లాల్లోని 24 మండలాల్లో కల్వకుంట్ల కుటుంబానికి 439.30 ఎకరాల భూమి ఉందని సిఎం రేవంత్ రెడ్డి వెల్లడించారు. ధరణి (భూమి రికార్డుల నిర్వహణ కోసం ప్రభుత్వం తెచ్చిన పోర్టల్) పేరుతో హరీష్రావు మామ హనుమంత్ రావు, మహేష్ రావు పేరిట 120 ఎకరాలు మార్చుకున్నారని ఆయన ఆరోపించారు.
రంగనాయక సాగర్ ప్రాజెక్టు కోసం రైతుల నుంచి భూమి సేకరించినప్పుడు, హరీష్రావు రైతులకు తక్కువ పరిహారం ఇచ్చి 14 ఎకరాలు తీసుకున్నారని సిఎం పేర్కొన్నారు. ప్రజాధనంతో తన ఫామ్హౌస్కు రోడ్లు వేయించుకున్నారని ఆయన ఆరోపించారు. సిరిసిల్లలో కెటిఆర్ బంధువులకు 8 వేల ఎకరాలు ఇచ్చారని, అప్పటి కలెక్టర్ సందీప్ కుమార్ ఝా 2,400 ఎకరాల ప్రభుత్వ భూమిని వెనక్కి తీసుకున్నారని సిఎం వివరించారు.
