హైదరాబాద్ కూకట్పల్లిలో జరిగిన సభలో సీఎం రేవంత్ రెడ్డి మాట్లాడుతూ, 22ఏ జాబితాలో జరిగిన పొరపాట్లను పరోక్షంగా అంగీకరించారు. చట్టబద్ధంగా పట్టాదారుల వద్ద ఉన్న భూములను కూడా ఈ నిషేధిత జాబితాలో చేర్చడం వల్ల ప్రజలు ఇబ్బందులు పడుతున్నారని ఆయన గుర్తించారు.
ఒక సర్వే నంబర్లో వందల ఎకరాలు ఉన్నప్పుడు, కేవలం కొన్ని ఎకరాల మీద కోర్టు కేసులు ఉంటే, మొత్తం భూమిని 22ఏ కింద చేర్చడం వల్లే సమస్యలు వస్తున్నాయని సీఎం వివరించారు. ఇలాంటి భూములకు ప్రత్యేకంగా బైనంబర్లు (ఉప సర్వే నంబర్లు) కేటాయించి, ప్రభుత్వ భూములను మినహాయించి, మిగిలిన భూముల రిజిస్ట్రేషన్లు జరిగేలా అధికారులను ఆదేశిస్తానని ఆయన తెలిపారు.
కొనుగోలు చేసిన భూమి లేదా కట్టుకున్న ఇల్లు ఎక్కడికీ పోదని, ఆందోళన చెందాల్సిన అవసరం లేదని సీఎం ప్రజలకు హామీ ఇచ్చారు. ఈ విషయంలో కొందరు దుష్ప్రచారం చేస్తున్నారని ఆయన పేర్కొన్నారు.
భవిష్యత్తులో ప్రజల భూములు రిజిస్ట్రేషన్ అయ్యేలా చూడటమే తన బాధ్యత అని సీఎం స్పష్టం చేశారు. ఈ ప్రక్రియను వేగవంతం చేసే దిశగా ప్రభుత్వం తదుపరి చర్యలు తీసుకోనుంది.
