శ్రావణ మాసం చివరి సోమవారం కావడంతో అశోక్ధామ్ ఆలయానికి భక్తులు భారీగా తరలివచ్చారు. ప్రత్యేక పూజల కోసం క్యూలైన్లలో వేచి ఉన్న సమయంలో ఆలయ ప్రాంగణంలో ఒక్కసారిగా గందరగోళం నెలకొంది.
ప్రాథమిక సమాచారం ప్రకారం, ఆలయ ప్రాంగణంలో విద్యుత్ వైర్ కింద పడటంతో భక్తులు భయాందోళనకు గురయ్యారు. ప్రాణభయంతో అందరూ ఒకేసారి బయటకు పరుగులు తీయడంతో తొక్కిసలాట జరిగి, పలువురు కిందపడిపోయారు.
ఈ ప్రమాదంలో ఏడుగురు భక్తులు మృతి చెందగా, గాయపడిన మరికొందరిని చికిత్స కోసం సమీపంలోని ఆసుపత్రులకు తరలించారు. ఘటన జరిగిన వెంటనే పోలీసులు, అధికారులు రంగంలోకి దిగి సహాయక చర్యలు చేపట్టారు.
ప్రస్తుతం అధికారులు ఈ ఘటనపై దర్యాప్తు చేస్తున్నారు. విద్యుత్ వైర్ ఎలా పడిపోయింది, తొక్కిసలాటకు దారితీసిన పరిస్థితులు ఏమిటనే అంశాలపై వివరాలు సేకరిస్తున్నారు.
