భారత ప్రభుత్వం వీసా విధానాన్ని మరింత సులభతరం చేస్తూ కీలక నిర్ణయాలు తీసుకుంది. ఇందులో భాగంగా ప్రధాన వీసా కేటగిరీలను 13 నుంచి 9కి, సబ్ కేటగిరీలను 49 నుంచి 23కి తగ్గించినట్లు కేంద్ర హోం వ్యవహారాల మంత్రిత్వ శాఖ (MHA) ప్రకటించింది. దరఖాస్తు ఫారాల్లో అడిగే వివరాలు, కాలమ్‌ల సంఖ్యను 65 నుంచి 70 శాతం వరకు తగ్గించడం ద్వారా ప్రయాణికులపై పత్రాల భారాన్ని ప్రభుత్వం తగ్గించింది.
గతంలో 2025 అక్టోబర్‌లో కూడా వీసా విధానంలో మార్పులు చేపట్టిన ప్రభుత్వం, తాజాగా ఆగస్టు 27న మరోసారి సమీక్షించి ఈ నిర్ణయం తీసుకుంది. అభివృద్ధి చెందిన దేశాల ప్రమాణాలను పరిశీలించిన అనంతరం, ఒకే తరహా ప్రయాణ అవసరాలకు సంబంధించిన వీసాలను ఒకే విభాగంలోకి చేర్చారు. దీనివల్ల దరఖాస్తుదారులు తమకు కావాల్సిన వీసాను సులభంగా ఎంచుకోవడానికి వీలుంటుంది.
కొత్త నిబంధనల్లో భాగంగా టూరిస్ట్ వీసాను Visitor Visaగా మార్చారు. పర్యాటకంతో పాటు స్వల్పకాలిక, చాలా కాలంగా ఉన్న ప్రయాణ అవసరాలను ఇందులో చేర్చారు. ఈ వీసాను రెండు రకాలుగా విభజించగా, మొదటి విభాగం వ్యాపార సమావేశాలు, వైద్య సంప్రదింపులు, వెల్‌నెస్ రిట్రీట్స్ (ఆరోగ్యం కోసం విశ్రాంతి కేంద్రాలు) వంటి వాటికి 30 రోజుల మల్టిపుల్ ఎంట్రీ సదుపాయంతో లభిస్తుంది.
రెండవ విభాగం పర్వతారోహణ వంటి కార్యకలాపాలకు కూడా వర్తిస్తుంది. ఇది అవసరాన్ని బట్టి ఒక సంవత్సరం, ఐదు లేదా పదేళ్ల కాలపరిమితితో అందుబాటులో ఉంటుంది. పర్వతారోహణ కోసం ఆరు నెలల మల్టిపుల్ ఎంట్రీ వీసాను జారీ చేస్తారు.
వైద్య చికిత్స కోసం వచ్చే వారి కోసం మెడికల్ వీసా విధానాన్ని కూడా మార్చారు. సంప్రదాయ వైద్యం, ఆయుష్ (ఆయుర్వేదం, యోగా, యునాని, సిద్ధ, హోమియోపతి వంటి భారతీయ వైద్య విధానాలు) చికిత్సలకు ప్రత్యేక విభాగాలు ఉంటాయి. M-1, M-3 వీసాలు రోగులకు, M-2, M-4 వీసాలు వారి సహాయకులకు వర్తిస్తాయి. ఇవి ఒక సంవత్సరం మల్టిపుల్ ఎంట్రీ సదుపాయంతో లభిస్తాయి, దీనివల్ల రోగులు ఫాలోఅప్ చికిత్సల కోసం పదేపదే దరఖాస్తు చేయాల్సిన అవసరం ఉండదు.
విద్యార్థుల కోసం స్టూడెంట్ వీసాను రెండుగా విభజించారు. పాఠశాల స్థాయి నుంచి పోస్ట్ గ్రాడ్యుయేషన్ వరకు S-1 వీసా, పరిశోధనలు, ఇంటర్న్‌షిప్‌లు, ఎక్స్ఛేంజ్ ప్రోగ్రామ్‌ల కోసం S-2 వీసా వర్తిస్తాయి. Study in India పోర్టల్ ద్వారా ప్రవేశం పొందిన వారికి గరిష్టంగా ఐదేళ్ల వరకు చెల్లుబాటు అయ్యే e-S1 వీసాను జారీ చేస్తారు. ఈ మార్పులు విదేశీ పర్యాటకులు, విద్యార్థులు, వ్యాపారవేత్తలకు మెరుగైన సౌకర్యాలు కల్పించడమే లక్ష్యంగా అమల్లోకి వచ్చాయి.
