1995 మధ్యకాలం నుంచి 2010ల ప్రారంభం వరకు జన్మించిన యువతను జెన్ జీ (Generation Z)గా పిలుస్తున్నారు. 2024 లోక్సభ ఎన్నికల సమయానికి దేశంలో మొత్తం 96.88 కోట్ల మంది ఓటర్లు ఉండగా, అందులో 18 నుంచి 29 ఏళ్ల మధ్య వయస్సు గలవారు 22.78 శాతం అంటే సుమారు 22 కోట్ల మంది ఉన్నారు. 2024 ఎన్నికలకు ముందు మాత్రమే రెండు కోట్లకు పైగా కొత్త యువ ఓటర్లు జాబితాలో చేరడం గమనార్హం.
రాజకీయ పార్టీల మద్దతు విషయంలో ఈ తరం ఏ ఒక్క పార్టీకి శాశ్వత మద్దతుదారులు కాదు. ఉపాధి అవకాశాల కొరత, ఆర్థిక మందగమనం, పెరుగుతున్న జీవన వ్యయం వంటి సమస్యల ఆధారంగానే వీరు తమ నిర్ణయాలను తీసుకుంటున్నారు. ముఖ్యంగా నిరుద్యోగిత 15 నుంచి 25 శాతం మధ్య ఉండటం, విద్యా వ్యవస్థలో లోపాలు, ప్రశ్నాపత్రాల లీకేజీలు యువతలో తీవ్ర అసంతృప్తిని నింపుతున్నాయి. జంతర్మంతర్ వద్ద జరిగిన నిరసనలు, చలో సన్సద్ వంటి కార్యక్రమాలు యువతలోని పోరాట పటిమను, రాజకీయ చైతన్యాన్ని బయటపెట్టాయి.
రాష్ట్రాల వారీగా చూస్తే దాద్రా అండ్ నగర్ హవేలీ, దమన్ అండ్ డయ్యూలో జెన్ జీ ఓటర్ల వాటా 39 శాతంగా ఉండగా, మేఘాలయలో 36 శాతంగా ఉంది. జార్ఖండ్, రాజస్థాన్, అసోం, బీహార్ వంటి రాష్ట్రాల్లో ఈ శాతం 25 నుంచి 29 మధ్య ఉంది. 2029 నాటికి దేశవ్యాప్తంగా ప్రతి నలుగురు ఓటర్లలో ఒకరు జెన్ జీకి చెందినవారే అయ్యే అవకాశం ఉంది. ఈ గణాంకాలు రాబోయే అసెంబ్లీ, లోక్సభ ఎన్నికల్లో యువత పాత్ర మరింత కీలకం కానుందని స్పష్టం చేస్తున్నాయి.
యువత ఆకాంక్షలను నిర్లక్ష్యం చేసే రాజకీయ పార్టీలు భారీ మూల్యం చెల్లించుకోవాల్సి వస్తుంది. నాణ్యమైన ఉద్యోగాలు, పారదర్శక పాలన, మెరుగైన విద్యా అవకాశాలు కల్పించే పార్టీల వైపే యువత మొగ్గు చూపుతోంది. ప్రపంచంలోనే అత్యధిక యువ జనాభా కలిగిన దేశంగా, ఈ తరానికి తగిన అవకాశాలు కల్పించడం భారత ప్రజాస్వామ్య భవిష్యత్తుకు అత్యంత కీలకం.
