ఉపాధి, ఉన్నత విద్య కోసం అమెరికా, కెనడాలకు వెళ్తున్న భారతీయులు తీవ్ర మానసిక ఒత్తిడిని ఎదుర్కొంటున్నారని విదేశాంగ మంత్రిత్వ శాఖ (MEA) రాజ్యసభకు సమర్పించిన నివేదికలో పేర్కొంది. 21 నుంచి 30 ఏళ్ల వయస్సు గల యువత, విద్యార్థులు ఎక్కువగా నిరాశ, ఆందోళన వంటి సమస్యలతో బాధపడుతున్నట్లు అధ్యయనాలు చెబుతున్నాయి.
చదువు కోసం రూ. 50 లక్షల నుంచి రూ. 80 లక్షల వరకు అప్పులు చేస్తున్న విద్యార్థులు, ఉద్యోగ మార్కెట్ మందగించడంతో ఆర్థిక ఇబ్బందుల్లో చిక్కుకుంటున్నారు. పార్ట్-టైమ్ పనులు దొరక్కపోవడం, జీవన వ్యయం పెరగడం వంటి కారణాలు వారిని తీవ్ర ఆర్థిక ఒత్తిడిలోకి నెడుతున్నాయి. ఒంటరితనం, భవిష్యత్తుపై అభద్రతా భావం వల్ల కొందరు మాదకద్రవ్యాలకు అలవాటు పడుతున్నారని నిపుణులు హెచ్చరిస్తున్నారు.
మరోవైపు, పశ్చిమాసియాలో అమెరికా-ఇరాన్ ఉద్రిక్తతల నేపథ్యంలో ఇరాన్లో చిక్కుకున్న 2,500 మంది భారతీయులను ప్రభుత్వం ఆర్మేనియా మీదుగా సురక్షితంగా స్వదేశానికి తరలించింది. కేంద్ర సహాయ మంత్రి కీర్తి వర్ధన్ సింగ్ తెలిపిన వివరాల ప్రకారం, విదేశాంగ శాఖ ప్రత్యేక కంట్రోల్ రూమ్, 24/7 ఎమర్జెన్సీ హెల్ప్లైన్ నంబర్లను ఏర్పాటు చేసి పౌరుల భద్రతను పర్యవేక్షిస్తోంది.
