హైదరాబాద్ నేపథ్యంలో సాగే ఈ వెబ్ సిరీస్లో వికాస్ వశిష్ట, గీత్ సైనీ, రాజేష్ ఖన్నా ప్రధాన పాత్రల్లో నటించారు. చదువు పూర్తి చేసుకున్న ముగ్గురు స్నేహితులు ఉద్యోగాల కోసం పడే కష్టాలు, ఆ క్రమంలో వారు ఎదుర్కొనే అవరోధాలను దర్శకుడు నీలగిరి మామిళ్ల తెరకెక్కించారు. టెలిఫ్యాక్టరీ బ్యానర్పై వంశీ కాంత్ రేవణ దీనిని నిర్మించారు.
కథానాయిక అరుణ మెకానికల్ ఇంజినీరింగ్ చదివినప్పటికీ సెక్యూరిటీ గార్డుగా పనిచేస్తుంటుంది. రమేష్, అక్షయ్ కూడా చిన్న చిన్న ఉద్యోగాలు చేస్తూ ఆర్థిక ఇబ్బందులు పడుతుంటారు. ఇద్దరు అబ్బాయిలతో అరుణ కలిసి ఉండటాన్ని ఆమె తల్లిదండ్రులతో సహా చాలామంది తప్పుబడతారు. ఈ నేపథ్యంలో ముగ్గురూ కలిసి ఒక వ్యాపారం ప్రారంభించాలని నిర్ణయించుకుని, అప్పులు చేసి మరీ ప్రయత్నిస్తారు.
వ్యాపారం ఆశించిన స్థాయిలో ఫలితాన్ని ఇవ్వకపోవడంతో స్నేహితుల మధ్య విభేదాలు మొదలవుతాయి. నిరాశలో ఉన్న ఈ ముగ్గురు తమ జీవితాల్లో ఎలా నిలదొక్కుకున్నారు అనేదే మిగతా కథ. ప్రస్తుతానికి మూడు ఎపిసోడ్లు అందుబాటులోకి వచ్చాయి. తొలి రెండు ఎపిసోడ్లలో కామెడీకి ప్రాధాన్యత ఇవ్వగా, మూడో ఎపిసోడ్ నుంచి కథ ఎమోషనల్ మలుపు తీసుకుంది.
నటీనటులు తమ పాత్రలకు పూర్తి న్యాయం చేశారని, ముఖ్యంగా ఇంటి యజమాని పాత్రలో రమేష్ ఈరావేన కామెడీ టైమింగ్ బాగుందని ప్రేక్షకులు భావిస్తున్నారు. హైదరాబాద్లోని నిజమైన ప్రదేశాల్లో చిత్రీకరించడం, సినిమాటోగ్రఫీ ఈ సిరీస్కు ప్లస్ అయ్యాయి. అయితే, కొన్ని సన్నివేశాలు సాగతీతగా అనిపిస్తున్నాయని, ఇంకాస్త ఎడిటింగ్ చేసి ఉంటే బాగుండేదనే అభిప్రాయం వ్యక్తమవుతోంది.
నాలుగున్నర దశాబ్దాల క్రితం వచ్చిన 'ఆకలి రాజ్యం' సినిమా నాటి నిరుద్యోగ సమస్యను ఎలా చూపించిందో, నేటి ఇంజినీరింగ్ గ్రాడ్యుయేట్ల నైపుణ్య లోపాన్ని ఈ సిరీస్ అలా ప్రతిబింబిస్తోంది. మూడో ఎపిసోడ్ చివరలో కథ నగరం నుంచి గ్రామానికి మారుతుందని, స్మార్ట్ ఫార్మింగ్ అంటే ఆధునిక సాంకేతికతతో వ్యవసాయం చేయడం గురించి చూపించబోతున్నారని లీడ్ ఇచ్చారు. తదుపరి ఎపిసోడ్లలో కథను ఎలా నడిపిస్తారనే దానిపైనే ఈ వెబ్ సిరీస్ విజయం ఆధారపడి ఉంది.
