NEET PG 2026 పరీక్షకు హాజరయ్యే అభ్యర్థులకు పంపిన పరీక్షా కేంద్రాల వివరాల్లో సాంకేతిక సమస్య (Technical Glitch) తలెత్తింది. ఈ పొరపాటును గుర్తించిన నేషనల్ బోర్డ్ ఆఫ్ ఎగ్జామినేషన్స్ ఇన్ మెడికల్ సైన్సెస్ (NBEMS), బుధవారం దీనిపై వివరణ ఇచ్చింది. అభ్యర్థులందరికీ సరైన పరీక్షా కేంద్రాల వివరాలను ఈమెయిల్ మరియు ఎస్ఎంఎస్ ద్వారా తిరిగి పంపినట్లు బోర్డు వెల్లడించింది.
పాత సమాచారాన్ని పరిగణనలోకి తీసుకోవద్దని, కేవలం అధికారిక వెబ్సైట్లో ఉన్న వివరాలను మాత్రమే చూసుకోవాలని బోర్డు సూచించింది. నకిలీ వెబ్సైట్లు లేదా తప్పుడు సమాచారాన్ని నమ్మవద్దని అభ్యర్థులను హెచ్చరించింది. ఈ నెల 30న జరగనున్న ఈ పరీక్ష కోసం, అభ్యర్థులు తమ పరీక్షా కేంద్రాలను అధికారిక పోర్టల్లో సరిచూసుకోవాలి.
మరోవైపు, దరఖాస్తుల్లో ఫొటో, సంతకం, వేలిముద్రలు నిబంధనల ప్రకారం లేని అభ్యర్థులకు NBEMS చివరి అవకాశం కల్పించింది. ఆగస్టు 15 రాత్రి 11.55 గంటలలోపు అభ్యర్థులు తమ వివరాలను ఎడిట్ చేసుకోవాలి. ఈ గడువులోగా తప్పులను సరిచేయని పక్షంలో దరఖాస్తులను తిరస్కరించే అవకాశం ఉందని బోర్డు స్పష్టం చేసింది.
పరీక్ష మరియు కౌన్సెలింగ్ ప్రక్రియ ముగిసే వరకు దరఖాస్తులో పేర్కొన్న మొబైల్ నంబర్, ఈమెయిల్ ఐడీలను అందుబాటులో ఉంచుకోవాలని బోర్డు సూచించింది. ముఖ్యమైన సమాచారాన్ని ఎప్పటికప్పుడు వీటి ద్వారానే పంపనున్నందున, అభ్యర్థులు క్రమం తప్పకుండా తమ ఈమెయిల్, మెసేజ్లను పరిశీలించుకోవాలని కోరింది.
