శతాబ్దాల చరిత్ర కలిగిన బొబ్బిలి వీణ త్వరలో అయోధ్యలోని శ్రీరామ మందిరంలో కొలువుదీరనుంది. బొబ్బిలి ఎమ్మెల్యే బేబీ నాయన చొరవతో ఈ అరుదైన వాయిద్యాన్ని రామాలయానికి అందించేందుకు ఏర్పాట్లు పూర్తయ్యాయి. ఆలయ అధికారుల నుంచి అవసరమైన అనుమతులను కూడా ఇప్పటికే పొందారు.
ఈ వీణ తయారీకి శిల్పి సర్వసిద్ధి గంగాధరాచారి సుమారు రెండున్నర సంవత్సరాల సమయం వెచ్చించారు. రోజ్వుడ్తో తయారు చేసిన ఈ వీణలో 24 ఫ్రెట్లు ఉన్నాయి. ఒకే చెక్క ముక్కతో రూపొందించిన ఈ కళాఖండం బరువు సుమారు 55 కిలోలు ఉంటుంది.
ఉత్తరాంధ్ర కళా సంపదకు జాతీయ స్థాయిలో గుర్తింపు తీసుకురావాలనే లక్ష్యంతో ఈ వీణను తయారు చేశారు. ఇప్పటికే భౌగోళిక గుర్తింపు పొందిన బొబ్బిలి వీణ, అయోధ్య వంటి ఆధ్యాత్మిక క్షేత్రంలో చోటు దక్కించుకోవడం ద్వారా దేశవ్యాప్తంగా ఈ కళపై ఆసక్తి పెరుగుతుందని నిపుణులు భావిస్తున్నారు.
ప్రస్తుతం ఈ కళను కొనసాగిస్తున్న కళాకారుల సంఖ్య తగ్గుతుండటం ఆందోళన కలిగిస్తోంది. ఈ నేపథ్యంలో, అయోధ్య రామాలయంలో వీణను ప్రతిష్ఠించడం ఉత్తరాంధ్ర కళా వైభవాన్ని దేశానికి చాటిచెప్పే చారిత్రక ఘట్టంగా స్థానికులు అభివర్ణిస్తున్నారు.
