ఎన్నికల సమయంలో ఇచ్చిన హామీలను కాంగ్రెస్ ప్రభుత్వం నెరవేర్చలేదని రాష్ట్ర కార్పొరేషన్ (వీసీసీ) మాజీ చైర్మన్ డా. కేతిరెడ్డి వాసుదేవరెడ్డి విమర్శించారు. ఈ నేపథ్యంలో, ప్రభుత్వ వైఫల్యాలను ఎండగట్టేందుకు జూలై 18న 'యువ సంగ్రామ సదస్సు' నిర్వహిస్తున్నట్లు ఆయన తెలిపారు. శుక్రవారం అశోక్ నగర్, దిల్సుఖ్ నగర్లో నిరుద్యోగ యువతతో సమావేశమైన కేతిరెడ్డి, ఈ సదస్సును విజయవంతం చేయాలని పిలుపునిచ్చారు.
అసెంబ్లీ ఎన్నికల ముందు కాంగ్రెస్ పార్టీ నిరుద్యోగులకు అబద్ధపు హామీలు ఇచ్చిందని ఆయన ఆరోపించారు. ఏడాదిలో రెండు లక్షల ఉద్యోగాలు ఇస్తామని చెప్పి, నిరుద్యోగుల జీవితాలతో ఆడుకున్నారని మండిపడ్డారు. బీఆర్ఎస్ ప్రభుత్వం జారీ చేసిన నోటిఫికేషన్లకే నియామక పత్రాలు అందజేసి, కాంగ్రెస్ ప్రభుత్వం తమ ఘనతగా చెప్పుకుంటోందని ఆయన విమర్శించారు.
ముఖ్యమంత్రి రేవంత్ రెడ్డి, రాహుల్ గాంధీ, ప్రియాంక గాంధీలకు పదవులు దక్కాయని, కానీ సాధారణ నిరుద్యోగులకు మాత్రం ఉద్యోగాలు రాలేదని కేతిరెడ్డి పేర్కొన్నారు. ప్రియాంక గాంధీ హామీ ఇచ్చినట్లు నెలకు రూ. 4 వేల నిరుద్యోగ భృతి కూడా అందలేదని గుర్తు చేశారు. ముఖ్యమంత్రి చేసిన అహంకారపు వ్యాఖ్యలను నిరుద్యోగులు వ్యతిరేకించాలని ఆయన కోరారు.
సరూర్నగర్లో జరగనున్న ఈ సదస్సుకు రాష్ట్రవ్యాప్తంగా ఉన్న నిరుద్యోగ యువత వేలాదిగా తరలిరావాలని కేతిరెడ్డి విజ్ఞప్తి చేశారు. ప్రభుత్వం ఇచ్చిన మోసపూరిత హామీలపై ఈ వేదిక ద్వారా గళం విప్పాలని ఆయన సూచించారు.
